Drejtuesi i Alphabet, kompania mëmë e Google, Sundar Pichai, ka paralajmëruar se asnjë kompani teknologjike nuk do të mbetet e paprekur nëse industria e inteligjencës artificiale (AI) përballet me një krizë të papritur financiare. Deklaratat u bënë për BBC News, në një kohë kur vlerat e aksioneve në sektorin e AI janë rritur me ritme të shpejta gjatë muajve të fundit.
Pichai e përshkroi rritjen e investimeve në AI si një “moment të jashtëzakonshëm”, por pranoi se në këtë bum global ka edhe elementë të “irracionalitetit”. Ai tha se Google është e përgatitur për çdo skenar të mundshëm, por theksoi “Mendoj se asnjë kompani nuk do të jetë imune, përfshirë edhe ne.”
Rritja e shpejtë e investimeve, sipas tij, sjell rreziqe të ngjashme me periudhën para shpërthimit të flluskës dotcom në vitet 2000.
Aksionet e Alphabet janë dyfishuar në vlerë në shtatë muaj, duke arritur në 3.5 trilionë dollarë. Investitorët shohin potencial të madh në aftësinë e Google për të konkurruar me OpenAI, ndërsa kompania amerikane po zgjeron zhvillimin e çipeve të specializuara për AI, për të rivalizuar Nvidia-n, e cila së fundmi ka arritur vlerësimin rekord prej 5 trilionë dollarësh.
Megjithatë, disa analistë paralajmërojnë se rrjeti i marrëveshjeve rreth OpenAI, me vlerë 1.4 trilionë dollarë, mbetet kompleks dhe i vështirë për t’u justifikuar, ndërsa parashikimet e të ardhurave të kompanisë janë më të ulëta se niveli i investimeve.
Kompania po rrit ndjeshëm praninë e saj në tregun britanik, me një investim prej 5 miliardë paundësh në infrastrukturë dhe kërkim gjatë dy viteve të ardhshme. Pichai tha se njësia DeepMind në Londër do të zhvillojë kërkime “të nivelit më të lartë”, ndërsa për herë të parë Google do të trajnojë modelet e saj të AI brenda Mbretërisë së Bashkuar.
Drejtori i Alphabet paralajmëroi për kërkesa në rritje energjetike të teknologjisë së AI, e cila vitin e kaluar përbënte 1.5% të konsumit global të energjisë. Ai tha se vendet duhet të investojnë në kapacitete të reja energjetike për të shmangur pengesat në zhvillimin ekonomik.
Pichai pranoi se rritja e kërkesës për energji ka sjellë vonesa në objektivat klimatike të kompanisë, por shtoi se Google mbetet e përkushtuar për të arritur neto-zero deri në vitin 2030.
Sipas Pichait, AI është “teknologjia më e thellë” që ka zhvilluar ndonjëherë njerëzimi. Ai tha se ajo do të transformojë mënyrën e punës në shumë profesione, duke sjellë njëkohësisht sfida shoqërore dhe mundësi të reja.
“Profesionet do të mbeten, por do të ndryshojë mënyra si punojmë dhe ata që përshtaten, do të bëjnë më mirë”, u shpreh ai.
