Moti i keq dhe reshjet intensive të shiut vijojnë të përfshijë vendin duke krijuara problematika në disa zona.
Një situatë rreziku u regjistrua gjatë natës në zonën e Çukës, në Bashkinë Sarandë, pasi niveli i lumit Bistrica e Madhe arriti kuotën kritike të argjinaturës dhe për një moment kërcënoi zonën përreth. Gjatë orëve të natës, argjinatura e majtë u çarë, duke shkaktuar përmbytjeve. Më herët, niveli i lumit kishte arritur edhe rrugën automobilistike në aksin Sarandë – Çukë – Konispol, duke e vendosur zonën në nivel emergjence.
Pas ndërhyrjes së strukturave vendore me hedhje rreth 30 makina me inerte, bëri të mundur uljen e nivelit të ujit me rreth 1.5 metra, duke e normalizuar situatën përkohësisht.
Autoritetet njoftojnë se situata në mëngjes është stabilizuar, por mbetet e brishtë, për shkak të dëmtimit të argjinaturës.
Situatë e vështirë është regjistruar edhe në qarkun e Fierit, ku ka prani uji në 50-60 hektarë tokë bujqësore në fshatrat Kashisht dhe Çerven. Një familje është evakuuar në fshatin Çerven si masë sigurie.
Në total, raportohen 30 ndërtesa me prezencë uji në oborre, konkretisht: 5 në Kashisht, 4 në Çerven dhe 21 në Ferras.
Edhe lumi Seman paraqet prurje të rritura, ndërsa në fshatin Kallm ka dalë nga shtrati, por pa kapërcyer argjinaturat. Deri tani nuk raportohen banesa të rrezikuara.
Në qarkun e Kukësit ka rënie gurësh në rrugë, kryesisht në aksin Sopot-Kerrnaje dhe Qafe Mejdan –Shipshan, por që subjektet kontraktore kanë vijuar punën për pastrimin dhe mirëmbajtjen e rrugëve.
Strukturat vendore, së bashku me Forcat e Armatosura, vijojnë të jenë në terren për të ndërhyrë në çdo moment në rast të përkeqësimit të situatës ose nevojës për evakuime të tjera..
