Emma Dakoli fiton edicionin e këtij viti të Zecchino d’Oro, konkursit historik të këngës së fëmijëve në Itali.
9-vjeçarja, bijë e dy emigrantëve shqiptarë nga Durrësi, ka triumfuar me këngën “Ci pensa il vento” duke u shpallur më e mira mes konkurentëve të tjerë, pjesëmarrës nga e gjithë Italia.
“DurrësLajm” ka kontaktuar me babain e vajzës, Flor Dakoli, i cili ende është i emocionuar nga fitorja e së bijës, pasi siç shprehet edhe vetë nuk e priste këtë triumf të Emmës së vogël.
“Gati qamë unë dhe bashkëshortja, kur u shpall emri i Emmës si fituese. Ishim në prapaskenë, kur dëgjuam të shpallej kënga fituese”,– tregon ai.
Kur nisën audicionet e Zecchino d’Oro-s një vit më parë, Emma mori pjesë dhe u përzgjodh për audicionin e radhës.
Dhe kështu si pa kuptuar vajza e vogël që ka nisur që në moshën 5-vjeçare të këndojë vijoi me audicionet e tjera, derisa e pa veten në skenën e konkursit më të rëndësishëm për fëmijë në Itali dhe më pas, “qershia mbi tortë”, fituese e tij.
Në videomesazhin e prezantimit, të publikuar në kanalet sociale të Zecchino d’Oro para garës, Emma shpjegon: “Kafsha ime e preferuar është macja, sepse është shumë e lezetshme dhe ushqimi im i preferuar janë lazanjat. Kam një motër të vogël pesëvjeçare që quhet Mia dhe në kohën e lirë pas shkollës luaj gjithmonë me të dhe me shoqet e mia”.
Familja durrsake jeton prej vitesh në Monza të Italisë. Që në moshën 5-vjeçare prindërit e saj nisën ta dërgojnë Emmën në kurse kantoje, duke parë aftësitë e lindura të të voglës së tyre.
Siç rrëfen babai i saj, të kënduarit nuk është një traditë familjare dhe ata janë surprizuar me talentin e vajzës së tyre. Përveç të kënduarit, vajza e vogël ndjek edhe kurs për pianon dhe kurse të tjera jashtëshkollore dhe deri më tani rezultatet e saj në shkollë janë shumë të mira.
“I kemi vënë kusht, që nëse bie në mësime do ta heqim nga kurset. Deri më tani nuk na ka zhgënjyer sepse është shumë mirë me mësime. Është një vajzë e qeshur, me shumë vetëbesim. Kur e përzgjodhën në Zechino d’Oro na tha do shkoj, do kënaqem. Po fitova, do jetë edhe më mirë! ”- rrëfen Flor Dakoli.
Emma frekuenton klasën e katërt në një shkollë në Monza dhe tani është paksa herët për të mësuar nëse do të jetë një këngëtare e ardhshme apo do t’i përkushtohet ndonjë tjetër hobi të saj.
Por e rëndësishme është që Emma brenda një viti ka arritur dy fitore mjaft të rëndësishme në dy konkurse, të mbajtura në Itali. Fillimisht, në prill, ajo rrëmbeu çmimin e parë në konkursin “Note in radio” dhe tani në “Zecchino d’Oro” duke u evidentuar si një talent mjaft i spikatur në fushën e muzikës.
Pas kësaj fitoreje mjaft të rëndësishme, për Emmën ky mund të jetë vetëm fillimi i një karriere të suksesshme në të ardhmen në fushën e muzikës.
Vogëlushja me origjinë shqiptare deri më tani i ka hedhur hapat ngadalë, por mjaft të sigurtë. Dhe me shumë mundësi, me zërin e saj dhe talentin e lindur suksesi në muzikë do të vijojë të jetë pjesë e pandarë e saj.
Momentin e shpalljes së Emma Dakolit fituese e Zecchino d’Oro e ndiqni këtu.
