HateAid, një organizatë gjermane këshillimi që lufton gjuhën e urrejtjes dhe nxitjen e urrejtjes në internet, është vendosur në shënjestër të administratë së Presidentit të SHBA-së, Donald Trump.
Dy drejtorëve të organizatës jofitimprurëse, së bashku me tre evropianë të tjerë, u është ndaluar hyrja në SHBA për dyshime censurimi të platformave amerikane në internet, siç njoftoi Departamenti i Shtetit i SHBA-së në X.
Në një deklaratë, dy drejtoreshat ekzekutive të HateAid, Josephine Ballon dhe Anna-Lena von Hodenberg, thanë se “nuk ishin të befasuara”. “Është një akt represioni nga një qeveri që shpërfill gjithnjë e më shumë sundimin e ligjit dhe përpiqet t’i bëjë të heshtë kritikët me gjithë fuqinë e saj.”
Rubio flet për “ideologë në Europë”
Ndalimi i udhëtimit, sipas deklaratave zyrtare amerikane drejtohet kundër “aktivistëve radikalë” dhe organizatave joqeveritare që kanë nxitur masa censure nga vende të treta.
“Për një kohë shumë të gjatë, ideologët në Evropë kanë udhëhequr përpjekje të organizuara për të detyruar platformat amerikane të ndëshkojnë ato pikëpamje amerikane që nuk u përshtaten atyre”, shkroi Sekretari i Departamentit të Shtetit, Marco Rubio në X. Rubio kërcënoi me ndalime të mëtejshme udhëtimi.
Ndalimi i udhëtimit prek edhe ish-Komisionerin francez të BE-së Thierry Breton, i konsideruar si arkitekti i “Digital Services Act”, Aktit të Shërbimeve Dixhitale, i cili rregullon platformat online në BE. Legjislacioni dhe zbatimi i tij praktik kanë për qëllim të parandalojnë shfaqjen e një hapësire ku funksionon ligji në internet.
Rubio foli për një “sulm ndaj të gjitha platformave amerikane të teknologjisë dhe popullit amerikan nga qeveritë e huaja”. Breton shkroi në platformën X: “Për miqtë tanë amerikanë: Censura nuk po ndodh aty ku mendoni se po ndodh.” Qeveria franceze reagoi gjithashtu me zemërim.
Qeveria amerikane vendosi gjithashtu sanksione ndaj Clare Melford, themelueses së Indeksit Global të Dezinformimit Britanik (GDI), dhe Imran Ahmed, themeluesit të Qendrës për Kundërshtimin e Urrejtjes Dixhitale (CCDH), e cila vepron në SHBA dhe Mbretërinë e Bashkuar.
Ahmed jeton në Uashington dhe tani përballet me dëbim nga SHBA-ja. Pronari i X, Elon Musk, e kishte etiketuar Qendrën për Kundërshtimin e Urrejtjes Dixhitale si një “organizatë kriminale” vitin e kaluar./DW
