Një zëdhënës i Ministrisë së Jashtme iraniane, Esmaeil Baghaei ka deklaruar se një numër anijesh mund të kalojnë ende nëpër Ngushticën e Hormuzit, me kusht që të koordinohen me marinën e Iranit.
Irani më parë ka kërcënuar se do të sulmojë ose do t’i vërë flakën çdo anijeje që përpiqet të përdorë ngushticën, duke çuar në një rënie pothuajse të plotë të trafikut detar dhe duke rritur çmimet e naftës dhe gazit.
Baghaei shtoi se disa anije mund ta përdorin ende rrugën ujore nëse ushtria e Iranit është në dijeni të qëllimeve të tyre.
“Pas ngjarjeve aktuale, në përgjithësi nuk mund të kthehemi në kushtet para 28 shkurtit… pasi e kemi kuptuar sa e rëndësishme është siguria e Ngushticës së Hormuzit, dhe kështu bënë edhe të tjerët”, tha ai.
Ngushtica e Hormuzit është një nga rrugët më të rëndësishme tregtare në botë, me rreth një të pestën e eksporteve globale të naftës që kalojnë nëpër këtë rrugë ujore.
Më herët këtë javë, presidenti amerikan Donald Trump tha se Irani do të përballet me vdekje dhe zjarr nëse vazhdon të pengojë transportin e naftës përmes ngushticës.
