Departamenti Amerikan i Shtetit ka njoftuar një shpërblim deri në 15 milionë dollarë për informacion mbi dërgesat e naftës të lidhura me Gardën Revolucionare Iraniane dhe rrjetet që lehtësojnë aktivitetet e tyre.
Në një deklaratë të lëshuar nga programi “Shpërblime për Drejtësi”, Uashingtoni u bën thirrje kujtdo që ka informacion mbi dërgesat e naftës bruto, cisternat e përfshira, kompanitë e përdorura ose individët e lidhur me transferimet “e paligjshme” të bashkëpunojnë me autoritetet amerikane.
Shtetet e Bashkuara e kanë akuzuar prej kohësh Teheranin për përdorimin e rrjeteve ndërkombëtare të transportit dhe ndërmjetësimit për të anashkaluar sanksionet ekonomike dhe për të financuar aktivitete ushtarake dhe grupe aleate në rajon.
Ndërkohë Irani për herë të parë ka kërcënuar në mënyrë të qartë se do të përpiqet të prodhojë një bombë bërthamore nëse lufta do të rifillojë.
“Një mundësi në rast të një sulmi të ri mund të jetë pasurimi i uraniumit në 90%, një nivel i përshtatshëm për armë bërthamore. Ne do ta diskutojmë këtë në Parlament”, tha zëdhënësi i Komitetit të Sigurisë Kombëtare, Ebrahim Rezaei.
Ndërkohë fatura e SHBA-ve për luftën me Iranin tani vlerësohet të jetë rreth 29 miliardë dollarë dhe ndërprerja e infrastrukturës kryesore të energjisë nga konflikti po kërcënon të mbajë çmimet e gazit të larta për amerikanët.
Lufta e SHBA-së kundër Iranit ka kushtuar 29 miliardë dollarë deri më tani, sipas Jay Hurst, i cili po kryen detyrat e Kontrollorit të Pentagonit. Shifra është 4 miliardë dollarë më e lartë se shifra zyrtare që Pentagoni i dha Kongresit dy javë më parë. Megjithatë, një ekspert i buxhetimit të luftës i tha CNN se konflikti në fund të fundit do t’u kushtojë taksapaguesve amerikanë të paktën 1 trilion dollarë.
Zyrtarët e Departamentit të Energjisë të SHBA-së rritën parashikimin e tyre për çmimet e gazit dhe paralajmëruan se kontratat e ardhshme të naftës ka të ngjarë të qëndrojnë mbi 100 dollarë për fuçi në javët e ardhshme. Çmimet me pakicë të gazit tani pritet të jenë mesatarisht 3.88 dollarë për galon këtë vit dhe 3.62 dollarë vitin tjetër, sipas parashikimeve të reja të EIA-s.
Sakaq, sipas NBC News, ushtria amerikane po shqyrton mundësinë e riemërtimit të luftës me Iranin si “Operacioni Çekiç”. Kjo mund të ndodhë nëse armëpushimi dështon dhe Presidenti i SHBA-së Donald Trump vendos të rifillojë operacionet ushtarake në shkallë të gjerë.
“Çdo operacion i ri ushtarak kundër Iranit do të kryhet nën një emër dhe përcaktim të ri”, shtoi një zyrtar i Shtëpisë së Bardhë. Emri i ri i operacionit, në fakt, do të rifillonte numërimin mbrapsht prej 60 ditësh të nevojshëm për të marrë autorizimin e Kongresit për të shpallur luftë.
