Milani e ka shkarkuar drejtorin sportiv Zvonimir Boban, pas zënkës së tij publike me drejtorin ekzekutiv të klubit, Ivan Gazidis.
Ndërsa, klubi kuqezi tha se trajneri Stefano Pioli e ka mbështetjen e plotë të drejtuesve, përkundër negociatave me Ralf Rangnickun.
Situata në hierarkinë e Milanit ishte tensionuar dukshëm pas intervistës së Zvonimir Boban për “Gazzetta dello Sport”, ku kroati kishte thënë se Ivan Gazidis kishte shkuar prapa shpinës së tij dhe Paolo Maldini, dhe ia kishte ofruar Ralf Rangnickut pozitën e trajnerit për sezonin e ardhshëm.
Pas kësaj, një krizë i kaploi drejtuesit e Milanit. Të premten u raportua se Milani ia kishte dërguar një letër Bobanit për ta lajmëruar për shkarkimin dhe ky lajm është konfirmuar nga klubi sot.
“Milan e konfirmon se e ka informuar Zvonimir Bobain për shkëputjen e kontratës së tij. Klubi e falënderon Zvonimirin për shërbimet e tij gjatë nëntë muajve të fundit dhe ia uron atij më të mirat në të ardhmen. Klubi do të vazhdojë ta mbështesë Stefano Piolin dhe ekipin e tij të parë në të gjitha aspektet dhe e shikon pjesën e mbetur të këtij sezoni me optimizëm.
Ambiciet e klubit mbeten të jetë në nivelin më të lartë të futbollit evropian, përderisa investon në mënyrë të përgjegjshme në skuadër në pajtim me rregullat për ndershmëri financiare të UEFA-s”, shkruhet në deklaratën e lëshuar nga klubi.
