Kreu i PD-së Lulzim Basha ka dalë në një konferencë për shtyp në lidhje me përhapjen e koronavirusit, duke deklaruar se deri më tani kapacitetet aktuale që ka vënë në dispozicion qeveria, nuk i kalojnë 120 njësitë, numër që sipas tij tregon fare qartë se shteti është i papërgatitur për të përballuar situatën.
Më tutje Basha u shpreh se vetëm dje qeveria rakordoi fonde shtesë për t’i bërë ballës përhapjes së koronavirusit në Shqipëri, teksa këtë të martë numri i rasteve të prekur nga Covid-19 shtoi në 10.
“Kapacitetet aktuale të spitaleve shqiptare nuk i kalojnë 120 njësi, për të tajtuar 120 të infektuar që kanë nevojë për këtë trajtim, përndryshe u kërcënohet jeta. Kjo është kronikë e një dështimi të paralajmëruar”, tha Basha.
Lideri i demokratëve denoncoi sërish skandalin me maskat e skaduara që në 2011, të cilat i janë dhënë mjekëve në qendrat spitalore në Tiranë. Basha kërkoi ndërhyrjen e prokurorisë dhe nisjen e hetimit.
“Mbroja e vetme e këtij virusi janë shërbimet shëndetësor, por në Shqipëri nuk janë në kushte shumë të mira. Kjo që po ju tregoj tani është një kuti me maska, ku poshtë pullës shihet se data e skadencës së këtyre maskave është viti 2011. Kjo është kriminale dhe i bëj thirrje Prokurorisë që të marrë masa të menjëhershme. Shpërndarja e masakve të skadua është bërë me vetëdije, kjo është provë e një akti kriminal. Me maska të skaduara dhe pa mjete, personeli mjekësor rrezikon jetën e tyre dhe jetën e pacientëve. Kjo është për një papërgjegjshmëri totale. Nga ana tjetër dhe spitalet janë të papërgatitura për fluksin e pacientëve”, tha lideri PD-së.
