Drejtues të disa klubeve të Premier Leagues së Anglisë në futboll besojnë se stinori 2019\2020 ende mund të kompletohet, ndonëse nuk do të luhen ndeshje deri më 4 prill.
Sipas Sky Sports, drejtuesit e klubeve të Premier Leagues do të takohen të enjten për të diskutuar planet për të ardhmen, përkatësisht për pjesën e mbetur të stinorit.
Deri atëherë klubet do të kenë më shumë informata. Të martën UEFA pritet të marr një vendim për garat evropiane, duke përfshirë edhe Evropianin.
Vendimi që të pezullohet kampionati anglez u mor të premten në një takim emergjent të klubeve, pasi trajneri i Arsenalit, Mikel Arteta dhe mesfushori i Chelseat, Callum Hodson-Odoi dolën pozitiv në testet për koronavirus.
Një pjesë e klubeve besojnë se stinori megjithatë mund të kompletohet, ndërsa një pjesë tjetër vlerësojnë se është më reale që të nisin përgatitjet për edicionin e ri që duhet të fillojë në gusht.
Një burim i Sky Sports në një klub të Premier Leagues ka thënë se “gjasat janë 75 për qind që edicioni aktual të mos kompletohet”.
Drejtuesit e Premier Leagues do të paraqesin para përfaqësueseve të klubeve opsione të shumta, me implikimet financiare dhe sportive të tyre.
Shumë megjithatë do të varet nga vendimi që do të marr UEFA për Evropianin e këtij viti. Po rriten zërat që Evropiani të shtyhet për vitin tjetër. Futbolli vazhdon të goditet nga koronavirusi. Pas rasteve të reja në Itali, të shtunën edhe klubi spanjoll, Deportivo Alaves ka njoftuar se dy zyrtarë të tij janë testuar pozitiv për koronavirus.
