Kryetari i Bashkisë së Greater Manchester, Andy Burnham, ka konfirmuar për herë të parë se do të garojë për drejtimin e Partisë Laburiste, nëse hapet një garë për lidershipin. Deklarata e tij vjen mes spekulimeve në rritje për të ardhmen politike të kryeministrit britanik Keir Starmer.
Burnham tha se synimi i tij është të arrijë në nivelin më të lartë të politikës britanike dhe të përfaqësojë zgjedhësit e tij me sa më shumë ndikim. Ai shtoi se do të ishte i gatshëm t’i bashkohej një gare për kreun e partisë, por theksoi se fillimisht duhet të sigurojë mbështetjen e deputetëve laburistë.
Nga ana tjetër, kryeministri Keir Starmer ka reaguar duke bërë të qartë se nuk ka ndërmend të largohet nga drejtimi i partisë apo i qeverisë. Ai ka këmbëngulur se do të vazhdojë të udhëheqë Laburistët, të cilët aktualisht janë në pushtet në Mbretërinë e Bashkuar pas fitores së zgjedhjeve të përgjithshme të vitit 2024.
Deklaratat e Burnham konsiderohen si sinjali më i fortë deri më tani se ai mund të sfidojë Starmerin për lidershipin e Partisë Laburiste, nëse krijohen kushtet për një garë të tillë në të ardhmen.
