Gati gjysma e publikut britanik dëshiron një referendum të dytë për Brexit-in, duke përfshirë edhe një të pestën e votuesve të partisë Reform UK, sipas një sondazhi të ri dhe të rëndësishëm të realizuar 10 vjet pas vendimit të Britanisë për t’u larguar nga Bashkimi Europian.
Studimi i kryer nga Ipsos, King’s College London dhe organizata UK in a Changing Europe zbuloi se një pjesë e madhe e publikut është e hapur për një rregullim të marrëdhënieve me BE-në, ku pothuajse gjysma mbështet një marrëdhënie më të ngushtë dhe 60 për qind kërkojnë më shumë bashkëpunim në fushën e mbrojtjes.
Kërkimi sugjeron gjithashtu se qëndrimet përgjatë 10 viteve të fundit kanë ndryshuar si ndaj BE-së, ashtu edhe ndaj vetë referendumit. Numri i njerëzve që thonë se Brexit po shkon më keq nga sa e kishin parashikuar është pothuajse dyfishuar në pesë vitet e fundit, nga 27 për qind në vitin 2021 në 48 për qind sot – duke kaluar numrin e atyre që thonë se gjërat po shkojnë aq mirë ose më mirë nga sa pritej.
Ndërsa në vitin 2016 dy të tretat e publikut mendonin se David Cameron kishte të drejtë që shpalli referendumin, kjo shifër tani ka rënë në 43 për qind, ndërkohë që numri i atyre që thonë se ai ishte vendimi i gabuar ka pësuar rritje nga 24 për qind në 38 për qind.
Po ashtu, ka më shumë mbështetje për një referendum të dytë, me 48 për qind që tani thonë se do ta mbështesnin një të tillë, përballë 27 për qind që do ta kundërshtonin. Madje, studimi zbuloi se edhe një e pesta e votuesve të Reform UK dhe një e katërta e atyre që votuan për largimin (“Leave”) në vitin 2016, do të mbështesnin një votim të dytë.
Propozimi i një referendumi të ri për anëtarësimin në BE do të rriste gjithashtu numrin e njerëzve të gatshëm për të marrë parasysh votimin e Laburistëve në zgjedhjet e ardhshme nga 31 për qind në 45 për qind, ndërsa vetëm 27 për qind thanë se një ofertë për të ruajtur statuskuonë do t’i inkurajonte ata të votonin për këtë parti.
Megjithatë, qëndrimet ndaj BE-së mbeten “komplekse”, tha drejtori i kërkimeve në Ipsos, Keiran Pedley. Ai u shpreh: “Në pamje të parë ka një hapje ndaj një përafrimi më të madh dhe pranimit të rregullave për të lehtësuar një marrëdhënie më të fortë tregtare, por argumentet rreth sovranitetit – veçanërisht kur bëhet fjalë për imigracionin – mbeten bindëse.”
Ndonëse 53 për qind e publikut thanë se do të mbështesnin një rikthim të lirisë së lëvizjes në këmbim të aksesit në tregun e përbashkët të BE-së, kur pyetja shtrohej në kuadrin e sovranitetit, njerëzit prioritizonin kontrollin e imigracionit përpara marrëdhënieve me bllokun. Rreth 52 për qind thanë se preferonin kontroll të plotë të kufijve dhe një marrëdhënie më të kufizuar me BE-në, përballë 38 për qind që thonin të kundërtën.
Profesor Anand Menon, drejtor i organizatës UK in a Changing Europe, tha se ky kërkim tregoi që “nuk ka asnjë opsion të lehtë kur bëhet fjalë për marrëdhënien me BE-në”, ku secila mundësi sjell me vete “kompromise të qarta”.
Por pavarësisht ndryshimit të qëndrimeve ndaj BE-së, profesori Bobby Duffy nga King’s College London tha se opinionet po lëvizin “shumë ngadalë”, duke shtuar: “Me këtë ritëm, do të duhen edhe shumë vite të tjera para se të kemi një kërkesë të prerë për ndryshim.”
Debati mbi anëtarësimin e Britanisë në BE është riaktivizuar pasi ish-sekretari i shëndetësisë, Wes Streeting, deklaroi se vendi duhet të bashkohet sërish, si pjesë e platformës së tij për të udhëhequr Partinë Laburiste.
Zoti Streeting – i cili pritet të sfidojë liderin aktual pas largimit nga qeveria – muajin e kaluar tha se vendimi i Britanisë i vitit 2016 për t’u larguar nga Bashkimi Europian ishte “një gabim katastrofik” dhe argumentoi se Mbretëria e Bashkuar duhet të kërkojë rikthimin.
“Na duhet një marrëdhënie e re speciale me BE-në, sepse e ardhmja e Britanisë qëndron tek Europa, dhe një ditë – po, një ditë – do të jemi sërish brenda Bashkimit Europian,” tha ai.
Kjo vjen pasi The Independent zbuloi se blloku mund të përshpejtonte kthimin e Britanisë nëse ajo vendoste të ribashkohej, duke hedhur poshtë supozimet se Mbretëria e Bashkuar do të lihej në fund të radhës nëse do të tentonte të zhbënte Brexit-in.
Sandro Gozi, kryetari i delegacionit europian në Asamblenë Parlamentare BE-Mbretëri e Bashkuar, tha se Bashkimi Europian do ta shihte një kërkesë për ribashkim nga ana e MB-së si një “fitore të madhe për projektin europian”, duke këmbëngulur se do të kishte një mënyrë për ta kaluar atë me procedurë të përshpejtuar.
Burime nga Brukseli konfirmuan se ri-anëtarësimi i mundshëm i MB-së mund të ndodhte shumë më shpejt se sa për vendet e tjera kandidate, për shkak të përafrimit të saj të madh dhe ekzistues me rregullat e bllokut.
Sondazhi u realizua me 2,245 të rritur në të gjithë Britaninë e Madhe midis datave 15 dhe 20 maj të këtij viti.
