Një zjarr i fuqishëm ka shpërthyer në zonën e Peckham, në jug të Londrës, duke përfshirë një dyqan dhe një depo magazinimi. Re të dendura tymi të zi u panë mbi zonë, ndërsa dhjetëra kalimtarë u ndalën për të ndjekur zhvillimin e ngjarjes.
Në vendngjarje janë angazhuar rreth 100 zjarrfikës dhe 15 automjete zjarrfikëse, të cilët po punojnë për të vënë nën kontroll flakët dhe për të parandaluar përhapjen e tyre drejt ndërtesave përreth.
Brigada e Zjarrfikësve e Londrës u ka bërë thirrje banorëve të mbajnë dritaret dhe dyert e mbyllura për shkak të tymit të dendur, si dhe të shmangin zonën derisa operacioni të përfundojë.
Pamjet nga vendi i ngjarjes tregojnë flakë të mëdha që kanë përfshirë ndërtesën pranë një blloku banesash dhe bizneseve fqinje, ndërsa shërbimet e emergjencës vazhdojnë përpjekjet për shuarjen e zjarrit.
Si pasojë e incidentit, është prekur edhe qarkullimi në linjën hekurudhore Southeastern, pasi zjarri shpërtheu pranë shinave. Shkaku i zjarrit nuk është bërë ende i ditur.
