Policia në Glasgow arrestoi 15 persona pas përplasjeve gjatë dy protestave të zhvilluara të shtunën në qytet – një protestë kundër racizmit dhe një tjetër kundër emigracionit.
Protestuesit kundër racizmit u mblodhën në orën 11:00 në Glasgow Green, ndërsa një grup protestuesish kundër emigracionit u bashkua në të njëjtën zonë rreth një orë më vonë. Të dyja grupet përbëheshin nga qindra persona.
Policia ndërhyri për të ndarë dy palët dhe për të parandaluar përshkallëzimin e situatës. Pamjet nga vendi i ngjarjes treguan përleshje mes disa protestuesve, ndërsa oficerët përdorën shkopinjtë e policisë për të kontrolluar turmën.
Sipas Policisë së Skocisë, disa persona u larguan nga zona e protestës dhe shkaktuan trazira të tjera në qendrën e qytetit. Arrestimet u kryen për vepra të ndryshme, përfshirë sulm, posedim armësh të ndaluara, prishje të rendit publik, pengim të policisë dhe rezistencë ndaj arrestimit.
Shefja e policisë Emma Croft tha se ajo që ndodhi nuk ishte më një protestë e ligjshme, por një situatë që përfshinte “dhunë, frikësim dhe frikë”. Ajo deklaroi se policia kishte sekuestruar armë që tregonin për përgatitje të mundshme për trazira dhe dhunë të planifikuar.
Policia paralajmëroi se mund të ketë arrestime të tjera dhe tha se do të mbajë një prani të shtuar në qendrën e Glasgow pas përfundimit të protestave.
Ngjarjet kanë shkaktuar shqetësim te banorët, ndërsa autoritetet kanë bërë thirrje që protestat të zhvillohen në mënyrë paqësore dhe brenda ligjit.
