Një përmbledhje me poezi, disa prej të cilave janë shkruar me nxitim në copa letre mes dërgesave të ushqimit, i ka sjellë Wang Jibing një nga nderimet më të mëdha letrare të Kinës.
“Fluturim i ulët” (Low Flight), e frymëzuar nga vështirësitë e përditshme me të cilat përballen shpërndarësit e ushqimeve, ka fituar Çmimin Letrar Lu Xun – i quajtur sipas një shkrimtari që është cilësuar si babai i letërsisë moderne kineze.
Wang, 56 vjeç, i cili u bë shpërndarës ushqimesh rreth vitit 2019, fitoi popullaritet në rrjetet sociale për poezitë dhe esetë e tij.
Ai është pjesë e një grupi gjithnjë në rritje punëtorësh të profesioneve fizike, të cilët po vlerësohen për veprat e tyre letrare, që japin një pamje të presioneve dhe vështirësive me të cilat përballen në ekonominë gjigante kineze të punëve përmes aplikacioneve.
Për Wang-un, ky çmim prestigjioz letrar vjen pas disa dekadash të vështira si punëtor me punë të rastit.
“Mbajta frymën dhe u ndjeva jashtëzakonisht nervoz… Sapo u shpall rezultati, gjithçka u qetësua,” tha Wang për median shtetërore Global Times më 15 korrik, kur u bë e ditur se kishte fituar çmimin. Ai shtoi se vëmendja e madhe e medias ndaj tij i kishte krijuar shumë presion psikologjik.
Vlera e shpërblimit financiar për fituesit e Çmimit Letrar Lu Xun nuk bëhet publike, megjithëse në vitin 2014 ishte rreth 100 mijë juanë kinezë (afërsisht 14 800 dollarë amerikanë ose 11 mijë paund britanikë).
I lindur në provincën Jiangsu, Wang e la shkollën kur ishte adoleshent për shkak të vështirësive financiare në familje. Ai punoi në profesione të ndryshme, nga ndërtimtaria te mbledhja e mbetjeve dhe shitja e mallrave në një tezge rruge, përpara se të bëhej shpërndarës ushqimesh.
Por dashuria e tij për leximin vazhdoi dhe gjatë dekadës së fundit ai ka publikuar poezitë dhe esetë e tij në rrjetet sociale.
Në vitin 2022, një nga poezitë e tij, me titull “Njeriu me nxitim” (Man in a Hurry), u bë virale në internet. Ajo u frymëzua nga një ngjarje e vitit 2019, kur ai kaloi disa orë në një dërgesë tepër të vështirë pasi një klient kishte dhënë adresën e gabuar.
Në vitin 2023 ai botoi përmbledhjen e tij të parë me poezi: “Njeriu me nxitim: Poezi të një shpërndarësi ushqimesh”.
Pavarësisht se fitoi këtë çmim, Wang i tha medias se nuk kishte ndërmend të linte punën e tij dhe se planifikonte të vazhdonte të punonte deri në moshën 60-vjeçare.
“Financiarisht nuk kam nevojë për këtë punë për të jetuar, por më pëlqen atmosfera e saj dhe më mban në formë,” tha ai sipas raportimit të Global Times. “Dua një jetë të thjeshtë dhe të lidhur me realitetin, dhe çmimi nuk do të ndryshojë kurrë atë që jam.”
“Fluturim i ulët”, botuar në vitin 2024, është një përmbledhje poezish e frymëzuar nga intervistat dhe anketat që Wang zhvilloi me rreth 200 shpërndarës ushqimesh.
Një nga vargjet e tij thotë:
“Kush thotë se të hapësh krahët do të thotë të fluturosh lart? Edhe të fluturosh ulët është fluturim.”
Fitorja e tij vjen në një kohë kur një numër gjithnjë e më i madh punëtorësh të krahut në Kinë kanë filluar vitet e fundit të lënë gjurmë në botën e letërsisë.
“Unë shpërndaj paketa në Pekin”, një kujtim i vitit 2023 nga ish-korrieri Hu Anyan, u bë një bestseller i madh në Kinë dhe tërhoqi vëmendje edhe jashtë vendit. Një përkthim në anglisht i librit u botua vitin e kaluar.
Një tjetër vepër, “Unë jam Fan Yusu”, një ese autobiografike për përpjekjet personale të një punëtoreje migrante, pushtoi internetin kinez në vitin 2017. Reagimi ishte aq i madh sa Fan u detyrua përkohësisht të largohej nga shtëpia për shkak të kërkesave të pafundme të mediave.
Lu Xun, emri i të cilit i është vendosur çmimit letrar, konsiderohet gjerësisht një nga shkrimtarët më të mëdhenj kinezë të shekullit XX. Ai njihet për romanet e tij satirike, përmes të cilave kritikonte shoqërinë tradicionale kineze.
I kujtuar prej kohësh si një nga figurat më të rëndësishme të letërsisë kineze, veprat e Lu Xun kanë gjetur një jehonë të re te brezi i ri sot. Disa vite më parë, Kong Yiji, një personazh nga një prej romaneve të tij, u kthye në një simbol interneti që përfaqëson zhgënjimin e të rinjve kinezë që përpiqen të gjejnë punë.
