Një ngjarje tronditëse ka shokuar opinionin publik, pasi një grua 21-vjeçare, në muajin e tetë të shtatzënisë, u gjet e vrarë në rrethana makabre, ndërsa foshnja e saj ishte nxjerrë me forcë nga barku.
Viktima, María Camila Potosí, ishte raportuar e zhdukur më 16 korrik, pasi ishte larguar nga shtëpia për të shkuar në një takim të planifikuar. Disa ditë më vonë, trupi i saj u gjet pranë një lumi, i mbështjellë me batanije, me duar e këmbë të lidhura dhe me shenja të shumta dhune. Hetimet paraprake tregojnë se ajo ishte goditur disa herë me thikë dhe se foshnja ishte nxjerrë nga barku i saj.
Pamjet e kamerave të sigurisë tregojnë se e reja u pa për herë të fundit duke hipur në një motoçikletë me një grua, të cilën e kishte njohur vetëm pak javë më parë. Policia e ka identifikuar atë si një nga personat kryesorë që po hetohen në lidhje me krimin, ndërsa deri më tani nuk është bërë asnjë arrestim.
Autoritetet kanë nisur një operacion të gjerë për gjetjen e foshnjës, ndërsa familja e viktimës shpreson se ajo mund të jetë ende gjallë. Çështja po hetohet si vrasje e rëndë, ndërsa motivet e krimit mbeten ende të paqarta.
