Lojtarët dhe stafi i klubeve të Serisë A së Italisë në futboll do të testohen për koronavirus dhe më pas do të izolohen në qendra stërvitore, ku do të startojnë përgatitjet për rinisjen e sezonit, ka rekomanduar të mërkurën Federata e Futbollit të Italisë, njofton agjencia Reuters.
Rekomandimet kanë ardhur së bashku me udhëzimet e përgatitura nga komiteti shëndetësor i Federatës së Futbollit të Italisë, në mënyrë që sezoni i ndalur që prej 9 marsit për shkak të pandemisë, të rinis i sigurt, thuhet në komunikatë.
Federata italiane e futbollit shpreson që stërvitjet të nisin menjëherë pas izolimit që përfundon më 3 maj. Italia ka qenë një prej shteteve më të goditura nga koronavriusi, dhe lojtarët e disa ekipeve të Serie A ishin të infektuar.
“Në mënyrë që të rifillojë futbolli sigurt, është esenciale që në këtë periudhë të zhvillohen procedurat më të mira të mundshme për ta nisur sërish aktivitetin”, ka thënë ndër të tjerash Presidenti i Federatës italiane të futbollit, Gabriele Gravina. “Po punojmë pa u ngutur dhe pa pushim po ashtu, në mënyrë që të jemi gati kur institucionet të na japin dritën e gjelbër”, shtoi ai.
Federata thotë se në fillim të stërvitjeve, secili klub duhet të formojë një grup të lojtarëve, stafit teknik, mjekëve, fizioterapeutëve dhe pjesës tjetër të stafit që është negativ në teste dhe të izolohen në stilin e kampit stërvitor veror. Është thënë se të gjithë anëtarët e grupit duhet të testohen për koronavirus 96 orë para nisjes së kampit stërvitor.
Federata italiane është e vendosur që ta kompletojë sezonin ku kanë mbetur edhe 12 xhiro për t’u zhvilluar, edhe pse disa klube dëshirojnë që ta pezullojnë krejtësisht atë.
Po ashtu është njoftuar se ka gjasa që ndeshjet të mos luhen fare në veri të Italisë, vend që është prekur më së keqi nga COVID-19.
