Emiratet e Bashkuara Arabe vendosën sot të gjobisin çdo person deri në 5445 dollarë për përhapjen e informacionit të rremë shëndetësor, njoftoi agjencia zyrtare e lajmeve e këtij vendi, WAM.
Qeveria e Emirateve ia ngarkoi vetëm Ministrisë së Shëndetësisë dhe institucioneve të tjera shëndetësore shtetërore përgjegjësinë për shpërndarjen e informacionit dhe udhëzimeve shëndetësore të vërteta për kombin.
”Kjo masë e ndërmarrë e bën të paligjshëm qarkullimin ose ribotimin e çdo informacioni shëndetësor të rremë, mashtrues ose zyrtarisht të panjohur”, tha agjencia WAM.
Qeveria tha që rregullorja e re kishte për qëllim mbrojtjen e qytetarëve dhe adresimin e informacionit të rremë shëndetësor.
Vendimi vjen pasi Emiratet e Bashkuara Arabe konfirmuan gjithsej 6 302 raste të koronavirusit, duke e bërë atë vendin e dytë të goditur më rëndë nga virusi, pas Arabisë Saudite.
Emiratet e Bashkuara Arabe, një federatë prej shtatë emiratesh, kanë një popullsi prej rreth 9,8 milionë banorësh, përfshirë një komunitet të madh të huaj.
