Qeveria britanike njoftoi sot fillimin e një studimi të gjerë mbi përhapjen e koronavirusit të ri dhe zhvillimin e antikorpeve në popullsi, që mund të përfshijë deri në 300 000 persona në 12 muajt e ardhshëm.
“Ndërmarrë në bashkëpunim me Universitetin e Oxford-it dhe Zyrën Kombëtare të Statistikave, ky studim do të ndihmojë në përmirësimin e të kuptuarit të nivelit aktual të infeksionit dhe të numrit të personave që ka të ngjarë të kenë zhvilluar antikorpe kundër koronavirusit”, theksoi Ministria e Shëndetësisë në një komunikatë.
Rezultatet e para do të publikohen që prej fillimit të muajit maj.
Në fazën e parë, 25 000 persona që përbëjnë një kampion përfaqësues të popullatës do të japin mostra të marra nga fyti dhe hunda për të përcaktuar nëse ata janë infektuar nga virusi. Ata do të kryejnë një test të përjavshëm gjatë pesë javëve të para.
“Objektivi është të zgjerohet studimi në rreth 300 000 njerëz në vit”, thuhet në deklaratë.
“Përveç të tjerave, të rriturit e një mijë familjeve do të merren për një testim të gjakut çdo muaj për një vit, që do të kontribuojë në përcaktimin e proporcionit të popullsisë që ka zhvilluar antikorpe”, sipas të njëjtit burim.
