Për shkak të kufizimit të vizitorëve në institucionet fetare, kishat në Gjermani kanë hapur dyert për besimtarët myslimanë, që të ua mundësojnë atyre faljen e xhumasë. Një praktikë të tillë kanë ndjekur sidomos kishat në kryeqytetin e Gjermanisë, në Berlin
Mjeku kosovar në Berlin, Fahri Beqa, në një lidhje direkte për Gazetën Express ku ka folur rreth situatës me COVID-19 në Gjermani, ka treguar po ashtu edhe për solidaritetin fetar atje.
“Në tërë Gjermaninë ka pasur solidaritet të jashtëzakonshëm. Në objektet fetare ka qenë gjithçka e ndaluar, si në kisha e xhami, çdo tubim i qytetarëve ka qenë i ndaluar, por nga 18 maji janë liruar, për këtë objektet fetare kanë një solidaritet edhe më të theksuar, një kishë në Berlin ka hapur dyert çdo të premte për faljen e xhumasë, por gjithmonë duke respektuar rregullat. Nuk kanë mundur të futen më shumë se 50 persona, janë futur me grupe”, ka treguar Beqa.
