Një grup i protestuesve kanë rrëzuar statujën e eksploruesit italian Christopher Columbus në Saint Paul, Minnesota, të enjten. Është statuja e radhës në SHBA që është rrëzuar në protestat që po mbahen kundër brutalitetit të policisë dhe pabarazisë racore, shkruan agjencia Reuters.
Statuja e bronztë është tërhequr nga bazamenti i granitit nga disa persona të udhëhequr nga një aktivist për amerikanët indigjenë nga Minnesota, siç është parë nga fotografitë dhe xhirimet e kamerave.
“Ishte gjëja e duhur për të bërë dhe koha e duhur për të bërë”, ka thënë aktivisti Mike Forcia.
Protestat kanë filluar pasi afroamerikani George Floyd vdiq në paraburgim të policisë në Minnesota. Ai vdiq si pasojë e dhunës së policisë.
Aktivistët e amerikanëve indigjenë gjatë kanë kundërshtuar të nderojnë Columbusin, duke thënë se ekspeditat e tij në Amerikë kanë çuar te kolonizimi dhe gjenocidi ndaj paraardhësve të tyre.
Forcia ka thënë se është paralajmëruar se mund të arrestohet në ditët në vijim.
Një statujë tjetër e Columbusit në Miami është vandalizuar e po ashtu një në Boston.
Largim të statujave të eksploruesve, ish-kryeministrave apo edhe tregtarëve të dikurshëm të skllevërve janë rrëzuar edhe në pjesë tjera të botës në ditët e kaluara, përfshirë edhe në Britani. Në Britani madje janë vandalizuar statujat e ish-kryeministrit Winston Churchill.
Shtatë zyrtarë të policisë në Los Angeles ndërkohë janë larguar nga detyra pas përdorimit të forcës së ekzagjeruar gjatë protestave.
Lajmin e ka konfirmuar departamenti i policisë i Los Angelesit.
