Pakkush priste që Zinedine Zidane të largohej nga Real Madridi, kurse edhe më pak kanë pritur që ai të kthehej si trajner tek ekipi spanjoll. E, megjithatë, pothuajse 500 ditë më vonë, ai ka fituar titullin e kampionit në La Ligës, pa bujë dhe pa përmirësimet që i ishin premtuar.
Pas humbjes poshtëruese 7:3 nga rivali i qytetit, Atletico Madrid, në një miqësore parasezonale në SHBA, Zidane kishte këmbëngulur se Reali i tij do të jetë mirë pasi të fillonin garat e vërteta. Dhe ai kishte të drejtë. Pothuajse një vit pas asaj humbjeje, Zidane dhe Real Madridi e fituan titullin në ligën spanjolle – i pari për ekipin qëkur Zidane u kthye si trajner dhe i pari prejse u largua Cristiano Ronaldo.
Të enjten mbrëma, në stadiumin e zbrazët “Alfredo Di Stefano”, që është fusha stërvitore e Real Madridit, Zidane ngriti trofeun e tij të dytë në La Liga dhe të njëmbëdhjetin në përgjithësi si trajner. Këtë sukses, Reali e arriti pas fitores 2:1 ndaj Villarrealit, një xhiro pa përfunduar edicioni 2019/20 në La Liga, që rifilloi muajin e shkuar pas pauzës prej tre muajve shkaku i përhapjes së pandemisë të koronavirusit.
Për Realin ky ishte titulli i 34 në histori të klubit dhe i pari pas tre vjetësh. Kur u rizgjodh si trajner i Realit në mars të vitit të shkuar, presidenti i Real Madridit, Florentino Perez, insistoi se Zidane ishte kthyer për të filluar “një epokë të lavdishme”.
Mirëpo, ai ishte trajneri i tretë i Realit në atë sezon dhe mori ekipin që kishte 12 pikë prapa Barcelonës në tabelë dhe që ishte eliminuar nga Liga e Kampionëve prej Ajaxit. Shumica menduan se Zidane gaboi rëndë që u rikthye në krye të ekipit madrilen.
Zidane u pat larguar nga Reali në mars të vitit 2018 pasi fitoi tre trofeve të Ligës së Kampionëve.