Shtetet e Bashkuara kanë konfiskuar katër anije iraniane të mbushura me naftë, të cilat ishin nisur drejt Venezuelës.
Departamenti i Drejtësisë tha se kjo ishte dërgesa më e madhe iraniane e konfiskuar ndonjëherë.
Departamenti i Drejtësisë njoftoi të premten se sasia e konfiskuar e karburanteve nga katër anije përbëhet prej rreth 1,116 milionë fuçi nafte, duke thënë se kjo sasi ishte e lidhur me Gardën Revolucionare të Iranit, shkruan Free Europe.
Autoritetet amerikane e cilësuan aksionin e konfiskimit si pengim të suksesshëm të një dërgese multimilionëshe të karburanteve, e cila ishte planifikuar të dërgohej në Venezuelë.
“Me asistencën e partnerëve të huaj, dërgesa e konfiskuar është ndaluar nën kontrollin e Shteteve të Bashkuara”, njoftoi Departamenti i Drejtësisë.
Presidenti i Shteteve të Bashkuara, Donald Trump, tha se nafta e konfiskuar do të dërgohet në Houston të Teksasit.
“Irani nuk duhet ta bëjë këtë”, tha kreu i Shtëpisë së Bardhë gjatë një konference të shkurtër për gazetarë në Shtëpinë e Bardhë.
Shtetet e Bashkuara e cilësojnë Gardën Revolucionare të Iranit si organizatë terroriste dhe veprimet e kësaj njësie ushtarake janë të sanksionuara.
