15 shtatori shënon Ditën Ndërkombëtare të Demokracisë.
Kjo datë është përcaktuar në vitin 2007, me rezolutën e Asamblesë së Përgjithshme të Kombeve të Bashkuara, e cila inkurajon qeveritë që të forcojnë programet kombëtare për promovimin dhe konsolidimin e demokracisë.
Programi i Kombeve të Bashkuara për Zhvillim (UNDP) në Kosovë, në bashkëpunim me Kuvendin e Kosovës, do të shënojnë sot Ditën Ndërkombëtare të Demokracisë me një uebinar të titulluar: “E ardhmja që duam të shohim – demokracia dhe sundimi i ligjit në kohë krize” me fillim nga ora 15:00.
Pjesëmarrësit do të diskutojnë rreth ndikimit të Covid-19 në kontekstin e sundimit të ligjit dhe të drejtave të njeriut, dhe do të identifikojnë mundësi të reja për një qeverisje më të mirë, dialog social, dhe forcimin e demokracisë, sundimit të ligjit, dhe të drejtave të njeriut që janë gurthemel i zhvillimit të qëndrueshëm.
Folëseve kryesore në vebinar, Vjosa Osmani, Kryetare e Kuvendit të Kosovës dhe Maria Suokko, Përfaqësuese e Përhershme e UNDP-së do t’u bashkëngjiten Hilmi Jashari, Avokat i Popullit, Skender Çoçaj, Kryetar i Këshillit Gjyqësor të Kosovës, dhe Sarah Rattray, Specialiste e Politikave Globale për të Drejtat e Njeriut në UNDP, New York. Marta Gazideda, Zëvendës Koordinatore e programit në UNDP do ta moderojë këtë ngjarje.