Koalicioni i partive shqiptare në Mal të Zi “Njëzëri”, ka refuzuar të bëhet pjesë e qeverisë së re që po synohet të ndërtohet nga mandatari Zdravko Krivokapiq.
Në letrën që ky koalicion i përbërë nga Partia Demokratike, Unioni Demokratik i Shqiptarëve dhe Lidhja Demokratike në Mal të Zi, ia ka nisur sot Krovokapiqit, thuhet se refuzon të bëhet pjesë e një kabineti me parti që nuk e duan barazinë e shqiptarëve në këtë vend.
“Nuk mund të jemi pjesë e qeverisë së Malit te Zi, të cilën në mënyrë dominante e përbëjnë ato parti dhe politika, që nuk duan barazi për shqiptarët në këtë shtet…”, thuhet në letër.
Sipas letrës së firmosur nga Fatmir Gjeka, kjo do të ishte humbje e kohës.
Në letër, Krivokapiqit i janë kujtuar edhe disa veprime të këtyre partive që pritet të jenë në qeveri, e që në të shkuarën kanë qenë kundër shqiptarëve.
“Ato (partitë) nuk kanë votuar që Tuzi të bëhet komunë e pavarur. Ato nuk kanë votuarligjin për përdorimin e simboleve kombëtare, që do të do thotë edhe të flamurit shqiptar në Mal të Zi. Ato, e Kosovës e quajnë shtet të rrejshëm, e shpesh edhe terrorist!? Ato nuk duan një Mal të Zi qytetar, por një serb. Liderët e tyre në fillim të shekullit 21 ëndërrojnë për marrjen e Shkodrës, Dubrovnikut, Pejës e Prizrenit. Ato, anëtarësimin e Malit të Zi në NATO e quajnë gabim”, thuhet ndër të tjera në pikat që kjo aleancë ia ka numëruar Krivokapiqit si arsye për refuzim.
Në letër po ashtu është ftuar Krivokapiqi që të demantojë këtë nëse ka një të vërtetë tjetër.
“Nëse me veprime konkrete do të mund të na bindnit për të kundërtën, do të ishim shumë të lumtur. Natyrisht, në Kuvend të Malit të Zi do të mbështesim çdo iniciativë që vlerësojmë se do të jetë me interes për vendin”, thuhet në letrën e nisur sot.
Qeverinë e Malit të Zi pritet ta udhëheq Zdravko Krivokapiq si lider i koalicionit “Për të ardhmen e Malit të Zi, ndërkohë pjesë do të jenë edhe koalicioni “Paqja është kombësia jonë” e Aleksa Beçiqit dhe URA që udhëhiqet nga Dritan Abazoviqi.
Ftesë u është bërë edhe partive minoritare, por shqiptarët e kanë refuzuar tashmë ftesën.
