Shqipëria llogarit mbështetjen e Mbretërisë së Bashkuar për kandidaturën e saj në Këshillin e Sigurimit.
Ministri në detyrë për Europën dhe Punët e Jashtme, Gent Cakaj, zhvilloi një telefonatë me Ministren për Fqinjësinë Europiane dhe Amerikat të Mbretërisë së Bashkuar, Wendy Morton.
Ministrat gjatë telefonatës vlerësuan pozitivisht bashkëpunimin e ngushtë mes dy vendeve në organizata ndërkombëtare, veçanërisht në OSBE.
Më tej, ministrat u dakordësuan për të lidhur edhe disa marrëveshje dypalëshe, me qëllim zgjerimin e fushëveprimit të bashkëpunimit shumë dobiprurës mes dy vendeve.
“Një telefonatë e shkëlqyer me Ministren për Fqinjësinë Evropiane dhe Amerikat të Mbretërisë së Bashkuar, Wendy Morton. Vlerësuam pozitivisht bashkëpunimin e ngushtë mes dy vendeve në organizata ndërkombëtare, veçanërisht në OSBE. Po ashtu, e informova hollësisht për synimin e Shqipërisë për t’u bërë anëtare e Këshillit të Sigurimit për 2022-2023”, tha Cakaj në një reagim, lidhur me telefonatën e zhvilluar.
“Duke marrë parasysh bashkëpunimin dypalësh, vlerat e përbashkëta e aleancën e vyer në NATO, Shqipëria llogarit mbështetjen e Mbretërisë së Bashkuar për kandidaturën e saj në Këshillin e Sigurimit”, theksoi Cakaj.
“Në të njëjtën kohë, u pajtuam për të lidhur edhe disa marrëveshje dypalëshe, për të zgjeruar fushëveprimin e bashkëpunimit shumë dobiprurës mes dy vendeve”, u shpreh Cakaj.
