Kryetarja e Bashkisë së Shkodrës, Voltana Ademi ka depozituar ditën e sotme në Prokurori kallëzimin penal për krimet elektorale të kryera në votimet e 30 qershorit.
Ademi bën me dije se ka paraqitur të gjitha provat që sipas saj vërtetojnë shkeljet e ligjit në një proces që nuk kishte asgjë të përbashkët me zgjedhjet.
Kryebashkiakja e Shkodrës i bëri thirrje prokurorisë të bëjë detyrën dhe të hetojë pa iu nënshtruar asnjë presioni politik dhe të zbatojë vetëm ligjin.
“Kam ardhur sot para Prokurorisë për të bërë kallëzimin penal për krimet elektorale të 30 qershorit. I bëj thirrje Prokurorisë së bëjë punën, të zbatojë ligjin, të hetojë. Shkodranët dhe shqiptarët meritojnë ta dinë të vërtetën. Me dorëzimin e kësaj dosje dua të shpresoj dhe besoj se organet hetimore do të vijojnë punën bazuar në fakte që janë parashtruar në kallëzimin penal që janë parashtruar sot nga ana ime. Në dosje paraqiten të dhëna dhe fakte që lidhen me krimet elektorale, me vepra penale që kanë kryer persona të angazhuar me 30 qershor, të cilët për veprat që kanë kryer janë krime elektorale”, tha Ademi.
E pyetur nëse do të lirojë zyrën më 12 gusht, të zgjedhurit Socialist, kryebashkiakja në detyrë e Shkodrës tha se priten zhvillime politike.
“Zhvillime të tjera priten prandaj mendoj se duhet t’ja lëmë gjithsecilës ditë zhvillimin e saj. KJo në emër të drejtësisë dhe në emër të asaj çfarë me 30 qerhor, më para apo më pas ka ndodhur në vijim”, tha ajo.
Shkodra ishte një nga Bashkitë ku më 30 qershor u votua vetëm për kandidatët e Partisë Socialiste, ndërsa opozita që nuk mori pjesë në proces në vazhdimësi ka publikuar ato që i quan prova të krimit zgjedhor dhe paligjshmërisë./Ora News/
