Meta thirri mbledhjen e Këshillit të Sigurisë Kombëtare pas tensioneve në Ukrainë

 4,378 total views,  2 views today

Presidenti i Republikës Shqipërisë , Ilir Meta thirri të hënën në orën 16:00 mbledhjen e Këshillit të Sigurisë Kombëtare, ku u diskutua rreth zhvillimeve më të fundit në kufirin Ukrainë – Rusi, si dhe rreth pasojave të një përshkallëzimi të mëtejshëm nga një agresion i mundshëm ndaj sovranitetit dhe integritetit territorial të Ukrainës.

Kryeministri Edi Rama nuk ka qenë i pranishëm në këtë mbledhje sepse është nisur për në SHBA, për takimin me Sekretarin, Anthony Blinken. Të pranishëm në këtë mbledhje kanë qenë edhe Ministri i Mbrojtjes, Niko Peleshi, Ministri i Brendshëm, Bledi Çuçi, Shefi i Stabit të Ushtrisë , Bajram Begaj dhe Shefi i SHISH, Helidon Bendo.

Presidenti Meta theksoi në mënyrë të veçantë domosdoshmërinë e evidentimit dhe mbajtjes së kontakteve me qytetarët shqiptarë me banim të përkohshëm në Ukrainë dhe mundësimin e evakuimit të tyre në rast nevoje, vijimin e reformave në fushën e sigurisë dhe mbrojtjes, forcimin e kapaciteteve kundër sulmeve kibernetike, marrjen e masave për rritjen e sigurisë së infrastrukturës strategjike dhe garantimin e rezervave të shtetit për çdo rast, si dhe ndjekjen me vëmendje maksimale të zhvillimeve në rajonin tonë.

Presidenti Meta dhe anëtarët e Këshillit të Sigurisë Kombëtare konfirmuan se, Shqipëria, edhe si vend anëtar i NATO-s dhe anëtar jo i përhershëm i Këshillit të Sigurimit të Kombeve të Bashkuara, është në krah të Ukrainës, në mbrojtje të sovranitetit dhe integritetit territorial të saj, si dhe nxit dialogun dhe rrugën paqësore për zgjidhjen e krizës aktuale.