Pas më shumë se 4 orë diskutimesh, mbledhja e Këshillit për Rregulloren, Mandatet dhe Imunitetin për të vendosur nëse do t’i hapet rrugë arrestimit të Arben Ahmetajt, pas kërkesës së SPAK, është shtyrë për ditën e nesërme (12 korrik). Mbledhja është përcaktuar të zhvillohet në orën 16:00, ndërsa vendimi erdhi pas kërkesës së avokatëve të Ahmetajt.
Në një deklaratë për mediat, deputeti demokrat Gazment Bardhi e ka konsideruar antikushtetues vendimin, duke akuzuar maxhorancën socialiste se po tenton t’i japë kohë Ahmetajt që t’i fshihet drejtësisë.
“Diskutimet e SPAK nuk kishin informacion shtesë, përveç atyre të publikuara në media. Siç ishte paralajmëruar, për ti dhënë kohë Ahmetajt, siç konfirmuan avokatët që thanë që ndodhet jashtë Shqipërisë, në një tentativë antikushtetuese të maxhorancës për t’i dhënë kohë, u vendos të shtyhet seanca e Këshillit për ditën e nesërme duke tentuar shtyrjen për dhënien e autorizimit javën që vjen. Kjo është ndihëm dhe mbështetje që maxhoranca po i jep Ahmetajt për t’u fshehur nga drejtësia. Kuvendi duhej të kishte lejuar prokurorinë, ti jepe autorizimin për t’ju drejtuar gjykatës. Unë pyeta nëse Ahmetaj është në Shqipëri apo ndodhet në Kanada, nuk pata asnjë konfirmim dhe nuk dua të aludoj për vendin ku ndodhet Ahmetaj. Mes ditës së kërkesës së SPAK, 7 korrik dhe mbërritjes në Kuvend, kanë kaluar 3 apo 4 ditë që janë kohë e mjaftueshme që Ahmetaj të largohej nga vendi”, tha Bardhi.
Mbledhja e Këshillit të Mandateve nisi në orën 16:00, por u ndërpre për disa minuta pasi opozita ka kërkoi që të mbahet me dyer të hapura, ndërsa vetë SPAK kërkoi që të mbahet me dyer të mbyllura për shkak të sekretit hetimor.
Gjatë mbledhjes, opozita hodhi dyshime mbi vendndodhjen e Ahmetajt, teksa më pas ishin vetë avokatë e tij që konfirmuan se ai ndodhej jashtë territorit të Shqipërisë, por duke mohuar se qëllimi i largimit të Ahmetajt ishte arratisja. Megjithatë ata nuk bënë me dije vendin se ku është larguar ish-zëvendëskryeministri.
Deri më tani ndaj ish-zëvendëskryeministrit Arben Ahmetaj janë ngritur tre akuza penale, korrupsion pasiv, pastrim parash dhe deklarim i rremë dhe fshehje pasurie.
Hetimi për ish zëvendës kryeministrin Arben Ahmetaj ka përfshirë edhe bisedat telefonike të tij të para 11 viteve. Nga këqyrja e tyre rezultoi se nga data 21 korrik 2012 deri në 10 tetor 2012, pra në gati tre muaj, të ketë patur 138 komunikime telefonike dhe 3287 mesazhe mes Ahmetaj dhe Mirel Mërtirit. Më pas SPAK thotë se janë faktuar edhe lidhjet mes Ahmetajt dhe Klodian Zotos, biznesmenit të inceneratorëve.
Sipas hetimeve rezulton që ai të ketë përfituar rreth 500 mijë euro përfitime të nisura që nga viti 2016 deri më 2020. Madje SPAK ka arritur të zbulojë edhe shkëmbime e-mailesh kur Zoto informohej mbi procedurat për inceneratorët. Në një nga këto e-maile del edhe emir i Alda Klosit, ish-sekretares së përgjithshme të Ministrisë së Financave.
