Ambasadori i Shteteve të Bashkuara të Amerikës në Beograd, Kyle Scott ka folur për kushtet e arritjes së një marrëveshjeje përfundimtare për çështjen e Kosovës.
Ambasadori i Shteteve të Bashkuara të Amerikës në Beograd, Kyle Scott beson se zgjidhja e problemit të Kosovës duhet të vijë mes negociatave të drejtpërdrejta të Beogradit dhe Prishtinës.
“Shtetet e Bashkuara të Amerikës, por edhe askush tjetër, nuk duhet të diktojnë se si do të duhet të dukej ajo zgjidhje”, u shpreh Scott gjatë një interviste me të përditshmen serbe “Blic”, duke u përgjigjur në pyetjen nëse zgjidhja qëndron te korrigjimi i kufijve mes Kosovës dhe Serbisë, transmeton Lajmi.net.
Sipas tij, është me rëndësi që Serbia dhe Kosova të kthehen në dialog dhe për këtë arsye SHBA “ka dërguar porosi të qartë te Qeveria e Kosovës ta tërheq vendimin për taksë ndaj mallrave serbe dhe të Bosnjës e Hercegovinës”, shtoi ai.
“Atë porosi qartë ua kemi dërguar partnerëve tanë në Kosovë. Po ashtu, mendojmë se për rikthim në dialog është e rëndësishme që Serbia të luajë rolin e saj, në mënyrë që procesi të shkojë përpara, të implementohen marrëveshjet e arritura më herët dhe të konsiderohen kompromiset për të ardhmen”, u shpreh Scott.
I pyetur nëse SHBA do të ndërmarrë hapa të tjerë ndaj Kosovës, ai u përgjigj se: “Nuk është në rregull të spekulohet për veprimet potenciale”, por shtoi se “SHBA do t’i vazhdojë përpjekjet që ta nxisë Qeverinë e Kosovës t’i tërheq vendimet që paraqesin pengesë për rikthim në tavolinën e negociatave”.
“Edhe po, ekzistojnë opsione të tjera që mund të përfshihen, por mendoj se është shumë më e rëndësishme të fokusohemi në anën pozitive, siç janë tejkalimi i pengesave, rikthimi në tavolinën e negociatave, përqendrimi në dialog dhe arritja e marrëveshjeve të pranueshme nga të gjitha palët nën mbikëqyrjen e Bashkimit Evropian, që do të krijojë kushtet për normalizimin e raporteve. Ky është synimi ynë. Në këtë mënyrë do të forcohet stabiliteti në Ballkan, e kjo është në interes të Serbisë, Kosovës si dhe SHBA-së”, tha Scott, përcjell Lajmi.net.
