Kryeministri Edi Rama ka shkuar në Pogradec për Asamblenë e Zgjeruar të Partisë Socialiste. Duke folur nga Pogradeci, Rama theksoi edhe njëherë rëndësinë e hapjes së agroturizmit në Shqipëri, pasi ka përfitime të shumta nga turistët. Kryeministri theksoi edhe rritjen e rrogës për vitin e ardhëm, ku tha se janë 400 milionë euro fonde për shtimin e pagave. Ndërkohë që foli dhe për arritjet e qeverisjes së tij, Rama nuk ngurroi që të sulmonte dhe opozitën, që sipas tij, ngulin vetëm kuja. Po ashtu Rama shpjegoi dhe avancimin e portalit ‘e-Albania’, ku sipas tij nga viti tjetër do të funksjonojë me zë dhe me figurë. Për drejtësinë, Rama shtoi se ishte PS-ja ajo që e bëri dhe se nuk ka hapa mbrapa për këdo që ka shkelur ligjin.
Kryeministri Edi Rama ka deklaruar se ‘e-Albania’ do të avancojë me teknologjinë. Nga Asambleja e Përgjithshme e PS-së në Pogradec, Rama u shpreh çdo qytetar do ketë mundësinë të komunikojë në kohë reale përmes sistemit të ri të ‘e-Albania’ që është drejt përfundimit. Sipas Ramës sistemi do të jetë në kohë reale me zë dhe me figurë për tu përgjigjur çdo pyetje nga qytetarët
“Që ne të rrisim shumë më tepër kapacitetet e vendit në teknologji, flas për të gjitha sistemet teknologjike që mundësojnë një shpejtësi shërbimesh dhe transparencë të lartë. Ju e keni parë se sa shumë në ndihmë ju ka ardhur platforma e-Albania që sot e përdorin të gjithë. Tani, shumë shpejt e-Albania do ta keni në një formë tjetër, që do të jetë njësoj si kur shkruani mesazhe dhe kur merrni mesazhe dhe do të mund të komunikoni në kohë reale përmes një sistemi të ri që jemi duke e përfunduar dhe pastaj besoj brenda gjysmës së dytë të vitit të ardhshëm, s’dua të jap data, do ta keni e-Albanian në xhep me zë dhe figurë përmes Inteligjencës Artificiale. Do hapësh telefonin duke thënë kam nevojë për këtë, kam nevojë për atë, çfarë duhet të bëj për këtë, në cilën rubrikë të futem e kështu me radhë…Do jetë një person atje, që s’është person real, por i krijuar me AI që do të të orientojë. Ky është një shembull që po e sjell. Këto na ndihmojnë jashtëzakonisht shumë për të zhdukur komplet qoftë sekserët, qoftë nevojën për kushërinj dhe kushërinjtë t’i keni me shëndet po qoftë nevojë për kushërinj dhe krushq, edhe krushqit t’ju rrojnë, qoftë dhe kohën e pafundme që të harxhon marrëdhënia me zyrat,” tha Rama.
