Fjalën e tij në nisje të Asamblesë Socialiste, kryeministri Edi Rama e nisi me Tiranën, që sipas tij është një emergjencë që duhet adresuar, pasi prej 7 muajsh Erion Veliaj ndodhet në qeli. Në fjalën e tij kryesocialisti tha se duhet t’i hapim rrugë zgjedhjeve për kryetarin ri dhe propozoi Ogerta Manastirliun si kandidaten e duhur sipas tij për kryeqytetin.
“Sot duhet të marrim vendim për t’i hapur rrugë zgjedhjeve për një kryetar bashkie në Tiranë. Duhet vënë në lëvizje mekanizmi ligjor i shkarkimit të kryetarit. Tirana nuk mund të gdhihet e ngryset si trup pa kokë dhe qytetarët e Tiranës nuk mund të presim më as 7 ditë të tjera. Ogerta Manastirliu është njeriu që i duhet Tiranës”.
Rama u kërkoi socialistëve që ta mbështesin Manastirliun për të marrë udhëheqjen e Tiranës.
“Nuk kemi ku e kërkojmë një person më të përshtashëm për t’i kërkuar popullit të Tiranës mbështetjen e tij dhe për t’i dhënë lokomotivës së Shqipërisë shpejtësinë maksimale. Është radha jote e dashur Ogerta ta udhëheqësh Tiranën me qetësinë që të ka karakterizuar në të gjitha detyrat ku ke spikatur. Detyra jonë është të të mbështesim duke u vënë në rresht pas teje për kandidaturën bindëse të PS siç morëm falë drejtimit tënd të mençur një kandidat më shumë duke realizuar objektivin për Tiranën”.
Nëse kandidatura e Ogerta Manastirliut pranohet për kryetare të bashkisë së kryeqytetit dhe jep dorëheqjen si deputete, atëherë sipas listës së PS-së për Tiranën i hapet rruga Blerina Gjylametit për të qenë pjesë e Kuvendit.
Duke folur për Erjon Veliajn i cili ndodhet prej 7 muajsh në qeli, Rama u shpreh: “Pas 7 muajsh Tirana asnjë kryetar bashkie të votuar. Sot kemi një kryetar të zgjedhur nga populli të cilit i është mohuar e drejta e gjykuar në liri. Është bërë një gjyq i gjatë në tezgat e gjykimit mediatik dhe në shkelje e hapur të ligjit janë nxjerrë nga brenda nga ato tezga edhe biseda me familjarë nga telefoni i burgut. Kjo nuk ndodh në asnjë vend demokratik diktatorial jo e jo. Është shkelja më e hapur e më brutale në shpërdorim të detyrës nga ana e atyre që duhet të mbajnë nën kontroll materialet hetimore. Askush nuk di ta thotë sa mund të zgjasë kjo histori, ndërkohë asnjë zëvendësues i aprovuar nuk mund ta ketë legjitimitetin dhe forcën për ta udhëhequr edhe dy vjet në drejtimin e duhur bashkinë e këtij vendi. Tirana ka punë të mëdha dhe nuk i heq asnjë meritë kryetares në detyrë përsa ka bërë në këta 7 muaj anomale të paprecedentë”.
