Mazhoranca nuk do të tërhiqet nga kërkesa për shkarkimin e Presidentit Ilir Meta. Kështu deklaroi kryetari i grupit parlamentar të PS, Taulant Balla gjatë një interviste televizive.
Balla shprehet se do të jetë i pranishëm në seancën plenare të Komisionit të Venecias për të treguar shkeljet kushtetuese të Ilir Metës.
“Në të drejtën kushtetuese shkelja është gjithmonë e rëndë, sa herë kryhet me dashje. Kjo jo është e rëndë, por është shumë e rëndë. Vetë Ilir Meta e di që ka bërë një shkelje të rëndë të Kushtetutës”, tha ai.
Gjithashtu Balla deklaroi se PS nuk do të marrë parasysh propozimin e PD për strukturë të re për reformën zgjedhore.
“PD është mësuar të vendosë kushte që as vetë nuk i kupton. Sot Shqipëria ka detyrimin të plotësojë rekomandimet e ODIHR. Çështje që lidhen me sistemin zgjedhor nuk kanë të bëjnë fare me rrugën europiane të Shqipërisë, janë teka dhe tekanjozë”, tha Balla.
Për sa i përket kushteve të vendosura nga Budestagu gjerman, Balla deklaron se do të bëhen realitet brenda 2019-ës.
“Dita jonë e Pavarësisë do të na gjejë me të paktën 5 anëtarë në Gjykatën Kushtetuese, që është kuorumi i nevojshëm për funksionalitetin e kësaj gjykate”, tha Balla./ATSH/
