Ministri i Brendshëm, Taulant Balla u bëri thirrje të gjithë shqiptarëve që jetojnë jashtë territorit që të deklarojnë adresën e tyre.
Duke folur në parlament lidhur me ligjin “Për shtetësinë” zoti Balla tha se deri tani janë mbi 12 mijë qytetarë shqiptarë që jetojnë jashtë që e kanë deklaruar adresën e tyre. “Nëse në vitin 2025 mundësojmë votën e emigrantëve dhe ata të kenë përfaqësuesit e tyre në Kuvendin e Shqipërisë, kjo kalon përmes kësaj. Në votim mund të marrin pjesë vetëm ata që kanë kaluar në një proces të tillë”, shtoi ai.
Ministri Balla tha se ndryshimet në ligjin “Për shtetësinë” zgjidhin një sërë problematikash. Ato lehtësojnë dhe heqin disa pengesa të panevojshme ndaj shumë bashkatdhetarëve, që e meritojnë plotësisht pasaportën, por që me kuadrin ekzistues të ligjit për shtetësinë kjo ka qenë e pamundur.
“Një rast i tillë ka të bëjë me aplikimin për të marrë shtetësinë shqiptare të djemve e vajzave shumë të talentuar që mund të japin kontribut për ekipet kombëtare në sport”, tha ai.
Gjithashtu përmes amendimeve të tjera, përjashtohen nga testimi i njohurive të gjuhës shqipe dhe historisë së Shqipërisë, aplikantët për shtetësi me natyralizim, të cilët vijnë nga shtetet ku gjuha shqipe është gjuhë zyrtare.
Ministri Balla solli rastin e shtetasve të Kosovës që sipas tij, e flasin gjuhën shqipe dhe e njohin historinë e Shqipërisë.
Ai e cilësoi këtë një vendimmarrje historike për të çuar para një qasje të rëndësishme që vendi amë ka përkundrejt të gjithë atyre që aplikojnë për të marrë pasaportat me natyralizim.
