Deputeti i Partisë Socialiste, Besnik Bare, deklaroi të martën se Partia Demokratike dhe opozita vendosin kushte për të mos u ulur në dialog.
Gjatë një interviste televizive mbrëmjen e së mërkurës, Bare u shpreh i bindur se do dilet nga ngërçi politik ku ndodhet sot vendi, ndërsa shtoi se shkak i këtij ngërçi është vetëm opozita dhe kërkesat e saj të papranueshme.
“Unë besoj se do dilet nga ngërçi ku ndodhemi. Opozita e ka futur vendin në këtë ngërç me kërkesa shpeshherë të papranueshme. E kam fjalën për kërkesën që “Edi Rama nuk duhet të jetë kryeministër”, pasi këtë kërkesë nuk mund ta bëjë opozita. Kjo është në dorën e elektoratit dhe partisë që fiton zgjedhjet. Shumica e kërkesave të opozitës kanë karakter teorik. Të gjithë këto parime që kërkon opozita përmes kushteve të saj, janë bazë e ligjeve elektorale. Janë në themel të Kushtetutës dhe kritereve të Kopenhagenit. Prandaj them se problemi është fakti se ato vendosin kushte teorike për të mos u ulur në dialog”, – theksoi Bare.
Deputeti socialist tha se kompromisi do të arrihet vetëm kur Partia Demokratike të tregojë vullnetin për t’u ulur në dialog. “Unë jam i bindur që do të arrihet kompromisi, nëse PD do ketë vullnetin për ta arritur kompromisin. PS e ka shtrirë dorën shpesh për dialog, por Basha nuk është i interesuar të ketë kompromis, pasi kompromisi do të thotë ballafaqim elektoral, dhe Basha nuk do ballafaqim elektoral, pasi do e çonte në humbje dhe do ta vendoste përballë faktit të disa humbjeve radhazi dhe do e çonte përpara disa përgjegjësive para PD dhe elektoratit të saj. Ai s’ka interes për zgjedhje të parakohshme, Rama është më i interesuar se Basha për zgjedhje të parakohshme, pasi Basha nuk është i përgatitur për zgjedhjet dhe ballafaqimin me elektoratin”, – theksoi Bare.
Sa i takon çeljes së negociatave, Bare u shpreh se Partia Demokratike ka luajtur një rol negativ duke përçuar mesazhe jopozitive në Bruksel. “Me atë situatë dramatike të krijuar nga PD, me protesta me molotovë, sigurisht që imazhi që transmetoi Shqipëria ishte shqetësuese. Unë di që trupa diplomatike që është e akredituar në vendin tonë përçonte mesazhe pozitive në Bruksel dhe të nesërmen përfaqësues të PD çonin mesazhe negative për vendin”, – tha Bare.
I pyetur për zgjedhjet e 30 qershorit, Bare solli në vëmendje raportin e OSBE-së, duke theksuar se ato ishin të ligjshme. “Sigurisht është një gjë e jashtëzakonshme ajo që ka ndodhur në 30 qershor. Partia Socialiste nuk e ka si prioritet këtë pushtet, por e detyruar nga rrethanat, pasi një pjesë e opozitës nuk hyri në zgjedhje për arsye të tyre dhe nuk përfaqësoi një pjesë të elektoratit. Zgjedhjet u mbajtën dhe OSBE i quajti zgjedhje legjitime. OSBE është një trupë e pavarur dhe me integritet dhe kur e thonë ata që zgjedhjet ishin të ligjshme, vështirësia qëndron për t’i mbushur mendjen opozitës”, – përfundoi Bare.
