Javën e parë të punës së Komisionit Hetimor për inceneratorët, pas zgjatjes së mandatit, Lulzim Basha e cilëson sukses të padiskutueshëm në faktimin e asaj që e quan vjedhjen galopante të taksave të shqiptarëve.
“Faktet janë në dritë të diellit”.
Është i bindur se Kryeministri ka pasur dijeni madje dhe ka drejtuar aferën e inceneratorëve, ndaj pak ditë përpara se ai të merret në cilësinë e dëshmitarit përpara komisionit hetimor, i drejton një apel.
“Hiq dorë nga presioni që po i bën Strukturës së Posaçme Antikorrupsion. Çfarë Kryeministri është ky që ministri ngjyeka gishtin pas shpinës së tij. Se asgjë s’ka ndodhur pas shpinës së tij, se këto akte kanë ndodhur para syve të tij”.
Veç Ramës reshton mes emrave të përfshirë në këtë dosje dhe kryebashkiakë, ministra e ish-ministra.
“Aferën e dherave të Erion Veliajt, si është ndërtuar ky mekanizëm. Arben Ahmetaj, Damian Gjiknuri, Engjëll Agaçi”.
Apel ka dhe për SPAK-un, që zbulon se ka dijeni se janë nën presionin qeveritar për ta mbyllur dosjen pa çuar para drejtësisë abuzuesit e vërtetë.
“Ju bëhet shantazh nga një grup i strukturuar kriminal, mos e hani këtë presion. Vëruni prangat. Megjithatë, ju e dini vetë punën tuaj, por ta dini që po ju vëzhgojnë publiku, PD dhe partnerët”.
Akuzat për çështjen e inceneratorëve Basha i vijoi edhe në një takim me strukturat e partisë në Kamzë. Por kreu selisë blu tha në këtë situatë se edhe ish-kryeministri Berisha po përçan opozitën.
“Në mes të kësaj beteje duhet të durojmë edhe disa që vijnë vërdallë dhe nga mëngjesi deri në darkë vetëm shpifin dhe gënjejnë. Shpifin dhe gënjejnë, sulmojnë dhe denigrojnë këdo që nuk mendon si ata. Këtu duhet të jemi të qartë. Ka një PS, ka një LSI. Ka një dhe vetëm një PD.
Basha tha se opozita e detyroi mazhorancën që të miratonte në Kuvend ngritjen e komisioneve për Reformën Territoriale dhe atë Zgjedhore.
