Një lëvizje e çuditshme nga drejtuesit e Zonjës së Vjetër.
Medhi Benatia duket shumë pranë largimit, pasi mbrojtësi maroken ka kërkuar të lërë Juventusin, ku këtë stinor nuk po luan pothuajse fare.
Ndonëse sezonin e shkuar ishte një titullar, rikthimi i Leonardo Bonuccit e ka kthyer Benatian në një rezervistë.
Oferta e skuadrës Al Duhail nga Katari, duket më bindësja deri tani, pasi ata janë gati të paguajnë 8 milionë euro menjëherë për Benatia dhe 6 të tjera në formë bonusi në lidhje me paraqitjet.
Nga ana tjetër klubi bardhezi nuk ka humbur kohë për të gjetur zëvendësuesin e Benatia dhe ka kontaktuar menjëherë uruguaianin Martin Caceres, i cili aktualisht është pjesë e Lazios.
Për të rikthyer Caceres në Torino, bardhezinjtë kanë gjetur akordin me Lazion, për shumën e 600 mijë eurove dhe marrëveshja pritet të mbyllet pas kësaj fundjave, kur Juve të përballet me kryeqytetasit.
