Ish-kryeministri, Sali Berisha, ka reaguar për videon që bëri xhiron e rrjeteve sociale, në të cilën shihen zyrtarë të qeverisë shqiptare teksa darkojnë në një prej restoranteve më të njohura në Dubai.
Në një postim në facebook, Berisha shprehet se ndërsa ministrat ia shtrojnë në restorantin më të shtrenjtë të globit, invalidët nuk kanë marrë ende shpërblimin dhe as pensionin, ndërsa mijëra qytetarë të tjerë janë përmbytur nga reshjet e shiut që nuk ndalen.
“Narkoqeveritaret hajdute e te pashpirt, Ahmetaj, Balluku, Fuga, Mazniku etj zhgerryhen ne restorantin me te shtrenjte te vendit me te shtrenjte te rruzullit, El Nustret ne Dubai ku nje byftek i thjeshte kushton mijra euro, kurse invalidet nuk marrin shperblimin e as dhe pensionet dhe dhjetra mijra qytetare jane te permbytur. Derrave te kenaqur nuk ua ndjen per sokratet e vuajtur. Pashpirtesi!” shkruan Berisha.
Në video duket Arben Ahmetaj, Arbjan Mazniku, Belinda Balluku, Endri Fuga dhe Samir Mane. Thuhet se darka po konsumohet në një restorant të njohur në të gjithë botën, “Nusret”.
Pikërisht më 7 janar ministrja Balluku njoftoi se do të merrte pjesë në takimin për koordinimin e projektit të marinës së Durrësit në Emiratet e Bashkuara Arabe.
Ndërsa me 8 janar 2021, nga Emiratet e Bashkuara Arabe, ministrja e Infrastrukturës dhe Energjisë Belinda Balluku raportoi për situatën e krijuar nga përmbytjet.
Menjëherë pas videos qarkulluan edhe shumë meme të cilat paralelizojnë darkën në restorant me Shqipërinë në këto ditë të përfshirë nga reshje të shumta që kanë shkaktuar edhe përmbytje, shembje të urave dhe të akseve rrugore.
