Mijëra njerëz u mblodhën të shtunën në Belfast në një protestë kundër racizmit, pas dhunës që shpërtheu në qytet gjatë kësaj jave, ku shtëpi, biznese dhe automjete u shënjestruan dhe u dëmtuan.
Trazirat u nxitën pasi pamjet e një sulmi me thikë në veri të Belfastit të hënën në mbrëmje, ku viktima mbeti me plagë të rënda, u shpërndanë gjerësisht në rrjetet sociale. Një burrë është akuzuar për tentativë vrasjeje në lidhje me ngjarjen.
Tubimi i quajtur “Together Against Hate” (“Së Bashku Kundër Urrejtjes”) filloi rreth orës 13:00 pranë Belfast City Hall. Autoritetet policore mbyllën një numër rrugësh për të lehtësuar zhvillimin e protestës dhe lëvizjen e turmës.
Në protestë morën pjesë përfaqësues të disa partive politike dhe sindikatave të ndryshme.
Disa nga protestuesit mbanin pankarta me mesazhe si: “T’i kundërvihemi racizmit”, “Refugjatët janë të mirëpritur” dhe “Trazirat nuk flasin në emër të Belfastit”.
Protesta u organizua nga grupi United Against Racism.
