Ndihma ushtarake iu ofrua autoriteteve civile të policisë pas akuzës se një oficer qëlloi me armë zjarri 24-vjeçarin me ngjyrë Chris Kaba
Ministria e Mbrojtjes së Britanisë së Madhe ofroi mbështetje ushtarake për Policinë Metropolitane në Londër pasi dhjetëra oficerë dorëzuan lejet që u mundësojnë atyre të mbajnë armë zjarri, transmeton Anadolu.
Më shumë se 100 oficerë policie kanë dhënë dorëheqjen pasi një oficer policie në Londër u akuzua për vrasjen e një 24-vjeçari me ngjyrë të paarmatosur, Chris Kaba, javën e kaluar, raportoi BBC, duke cituar një burim të paidentifikuar.
Kaba u qëllua nga një oficer policie ndërsa ishte i paarmatosur më 5 shtator në Streatham, në jug të Londrës, pas një “ndjekjeje automjeti”. Oficeri, identiteti i të cilit mbrohet me ligj, do të paraqitet në gjykatë të enjten.
Komisioneri i Policisë Metropolitane, Mark Rowley përshëndeti revizionin e Zyrës së Brendshme për policinë e armatosur, duke bërë thirrje për reformë në mënyrën se si oficerët e policisë mbahen në përgjegjësi.
“Ekziston shqetësim nga ana e oficerëve të armëve të zjarrit se edhe nëse u përmbahen taktikave dhe trajnimeve që u janë dhënë, ata do të përballen me vite të tëra me procedura të stërzgjatura ligjore që ndikojnë në mirëqenien e tyre personale dhe të familjes së tyre”, tha ai në letrën e hapur për Sekretaren e Brendshme, Suella Braverman të dielën.
Pas zhvillimeve, Ministria e Mbrojtjes tha se mori një kërkesë për “Ndihmë Ushtarake për Autoritetet Civile” (MACA) nga Ministria e Brendshme që “të ofrojë mbështetje rutinë kundër terrorizmit për Policinë Metropolitane, nëse është e nevojshme”.
Sipas raportit të BBC, MACA i ofrohet policisë ose Shërbimit Shëndetësor Kombëtar (NHS) në situata emergjente, ku ushtria më parë ka ndihmuar stafin mjekësor gjatë pandemisë së COVID-19 dhe mbulon stafin kufitar grevistë dhe paramedikët në 2022.
