Aldo Bumçi, anëtar i Komisionit të Rilindjes Demokratike teksa flet për referendumin e thirrur nga Sali Berisha, që u zhvillua më 18 dhjetor, për të shkarkuar nga posti i kryetarit të PD-së, Lulzim Bashën, thotë se nuk ka rëndësi që referendumi të njihet nga ky i fundit, pasi ai tashmë është shkarkuar.
Në një intervistë për emisionin e mëngjesit “Ditë e Re” në ekranin e RTV Ora, Bumçi pohon se rëndësi ka mendimi i anëtarësisë, mbi 43 mijë anëtarë e PD-së votuan më 18 dhjetor pro shkarkimit të zotit Basha.
Bumçi: Nuk ka rëndësi mendimi i Bashës, sepse zoti Basha nuk ka nevojë ta njohë, ai është i shkarkuar. Ka rëndësi çfarë mendon anëtarësia e partisë për ty, ti mund ta mendosh veten dhe kryeministër, por ai nuk është kryeministër. Ai mund të mendoj që ka fituar zgjedhjet për kryeministër por nuk është.
Ndër të tjera Bumçi thotë se Basha i trajton strukturat e PD-së, si njerëz pa vlerë.
Bumçi: Ajo që po ndodh tani me partinë demokratike është zgjidhja dhe nuk është situata e para tre, katër muajve, ku ne ishim në një gjendje shumë të rëndë. Dhe duke shkuar drejt shuarjes si parti, sot pas nje procesi politik zoti Berisha filloi Foltoren kulmoi me thirrjen e kuvendit kombëtar. Ky kuvend nuk u njoh nga zoti Basha, ai i trajtoi strukturat e partisë së tis si njerëz pa vlerë.
Ofruam një kompromis që ai e refuzoi, caktoi një datë tjetër dhe më pas kuvendi që u bë në Air Albania, aty u mblodhën 4900 delegatë, dhe rreth 4 mijë anëtarët që nuk janë delegatë, që morën vendim për të shkarkuar zotin Basha dhe për të krijuar një komision rithemelimi të përkohshëm, deri sa partia demokratike të ringrejë strukturat e saj.
