Danimarka të mërkurën e filloi rihapjen e shkollave një muaj pasi ato qëndruan të mbyllura, duke u bërë shteti i parë evropian që e ndërmerr një hap të tillë.
Pjesë e vendimit janë çerdhet dhe shkollat fillore, të cilat u mbyllën më 12 mars si masë për parandalimin e përhapjes së koronavirusit.
Megjithatë, mësimi do të rifillojë vetëm në gjysmën e shkollave të vendit dhe vetëm në 35 për qind të shkollave të Kopenhagës, sepse disa shkolla kanë kërkuar më shumë kohë për t’i zbatuar protokollet shëndetësore.
Sidoqoftë, pritet që të gjitha shkollat e këtij shteti të Evropës Veriore të hapen nga 20 prilli, shkruan “The Guardian”.
Në fillim të këtij muaji, qeveria qendrore tha se shkollat do të hapen me kushtin që të gjithë të mbajnë distancë mes vete dhe t’i pastrojnë duart.
Nga shkollat është kërkuar që të sigurohet largësi prej dy metrave mes bankave që janë për vetëm një nxënës. Për t’i zbatuar më lehtë rregullat, disa shkolla po organizojnë mësim jashtë objekteve.
