Italia është një vend i fortë, transparent dhe i përgjegjshëm dhe ky është një apel që unë dua t’i dërgoj të gjithë bashkësisë ndërkombëtare, deklaroi ministri i Jashtëm italian, Luigi Di Maio në një intervistë për gazetën ”Corierre della sera”.
“Një raport ditor do t’u dërgohet të gjitha ambasadave tona në mënyrë që ato të mund të rrisin vetëdijen mes homologeve të tyre. Ne do të përditësojmë të gjitha qeveritë e botës me qartësinë maksimale në mbështetje edhe të italianëve që shkojnë jashtë vendit dhe të trupit tonë diplomatik, që po funksionon me profesionalizëm të madh”, shtoi ai.
”Për momentin ka dy vatra shpërthimesh të virusit që përfshijnë rreth 50 mijë njerëz nga 60 milion qytetarë. Infeksionet e reja janë brenda zonave të monitoruara. Ky është një virus i ri dhe duhet të monitorohet me kujdes. Prioriteti duhet të jetë shëndeti i italianëve”, deklaroi ministri.
”Si masë paraprake, do të ndërmarrim veprimet e duhura për ta mbajtur të ngushtë perimetrin e virusit. Deri më tani kemi zbatuar masat më të rrepta në Europë”, nënvizoi ai.
”Përveç pezullimit të pagesave të kësteve dhe faturave, qeveria do të mbështesë gjithë strukturën ekonomike dhe familjet në zonat e përfshira, por ne do të miratojmë një dekret që ndihmon të gjithë sistemin”, garantoi ai.
