Ish-deputetja e PD-ës, Grida Duma deklaroi sot qeveria në kulmin e krizës, vendos prioritet impiantët dhe jo shqiptarët në krizë të thellë.
Duma tha se vetëm pak ditë më parë qeveria, ka paguar 2 milionë euro për impiantin e Fierit dhe të Tiranës.
“Deri sot janë paguar plot 75 (shtatëdhjetë e pesë) milionë euro për të ashtuquajturët impiante që as nuk ekzistojnë. Dy milionë euro, në këto ditë të vështira, ditë të zeza për shpenzimet e shqiptarëve, ku secili ka nevojë për ndihmë financiare të drejtëpërdrejtë. Para ka, po para ka, por ato vidhen. Vidhen dhe më pas i nxjerrin jashtë Shqipërisë e i fshehin në parajsa fiskale. Pas muajsh pandemie dhe pas vitesh krize ekonomike, shqiptarët meritojnë më shumë se çdo moment ti jepen para nga taksat e tyre, që mos falimentojnë plotësisht”, tha ajo.
Duma shton se ky është prioriteti kur mjekët gënjehen se do merrnin shpërblimin e pandemisë dhe marrin thuajse asgjë në raport me punën.
“Ky është prioriteti impiantet?! Kur mësuesit punojnë me tre turne dhe nxënësit shpenzojnë përditë për maska e mjete mbrojtëse ndërsa bëjnë vetëm dy orë mësim. Ky është prioriteti? Kur pensionistët që s’blejnë dot as ilaçet, tani shpenzojnë edhe më shumë për të dalë në rrugë të mbrojtur nga pandemia. Prioritet është të sigurohen maska për gjithë dimrin për 1 milionë shqiptarë, dhe këtë duhet të bënte qeveria. Prioritet është të japësh bonus prej 1000 euro 2 mijë biznese të vogla dhe këtë mund të bënte me 2 milion euro. Prioritet është ushqimi i 2500 familjeve që kanë humbur vendin e punës, të cilët mund të marrin nga 16 mijë lekë (të reja) në muaj për 6-muajt e ardhshëm.Me 2 milion euro mund të jepej bonusi mujor prej 2 mijë lekësh (të reja) për më shumë se 20 mijë pensionistë”, tha ajo./ATSH/