Emigrimi i shqiptarëve me gomone drejt Britanisë së Madhe është kthyer në një debat publik në ishull.
Duke folur për Edicionin e Pasdites me moderatoren Armela Ferko në SYRI TV, Ervin Gjonaj nga ALBUKTV ka treguar se tregu britanik ka nevojë të madhe për punëtorë krahu.
Sipas tij, sektori i ndërtimit është në kërkim të punonjësve të rinj, dhe shqiptarët gjejnë punë.
‘Gomonet janë me drejtues irakianë ose kurdë. Nuk janë shqiptarë ata që kanë në pronësi këto gomone. Shqiptarët bëjnë vetëm organizimin e njerëzve.
Dikur çmimi ka qenë 5000 stërlina, dhe ka pasur edhe raste që shqiptarët kanë ardhur me 1200 stërlina, një rrugë.
Nuk është më Amerika, ëndërra e shqiptarëve, tani është bërë Britania e Madhe, si vendi ëndërr për të emigruar.
Britania ka filluar të monitorojë detin, duke i kapur ata në det. Por ka një ligj në Britani, që nëse kapen në det, duhet ti sjellësh ata njerëz në tokë dhe më pas të merresh me ta. Në muajin shtator pritet që të mblidhet parlamenti britanik për të miratuar një ligj të ri, ku njerëzit që kapen në det, të kthehen në vendin nga ku janë nisur.
Në Britani ka shumë kërkesa për krah pune. Më shumë se gati 90% e projekteve janë me vonesë në përfundim, pikërisht për shkak të mungesës së krahut të lirë të punës. Kjo është edhe arsyeja se pse vijnë shumë shqiptarë në Britaninë e Madhe’, tha gjatë intervistës në SYRI TV, Ervin Gjonaj.
