Dy persona të kërkuar nga autoritetet franceze për kontrabandë njerëzish përmes Kanalit të La Mansh duke përdorur varka të vogla janë arrestuar në Mbretërinë e Bashkuar nga Agjencia Kombëtare e Krimit.
Shqiptari Lulzim Brahaj, 47 vjeç dhe irakiani Rebin Sharif, 25 vjeç, u gjurmuan dhe u arrestuan në Londër të mërkurën e 5 shkurtit, sipas njoftimit të NCA, agjencisë Britanike Kundra Krimit të Organizuar të cilit i referohet Top Channel.
Ata u arrestuan nga oficerë specialistë të Njësisë Kombëtare të Ekstradimit, pasi të dy kërkohen në Francë ku prokurorët i akuzojnë për përfshirjen në disa kalime ilegale me varka të vogla në vitin 2022, si dhe për pastrim parash dhe vepra të krimit të organizuar.
Brahaj dhe Sharif dyshohen se rekrutuan emigrantë të paligjshëm që dëshironin të kalonin Kanalin dhe më pas pastronin të ardhurat midis janarit 2021 dhe qershorit 2023.
Burrat u paraqitën në Gjykatën e Magjistraturës së Westminsterit dje ku nisën procedurat e ekstradimit.
Shefi Rajonal i Hetimeve të NCA-së, Jacque Beer tha: “Falë punës së njësisë së ekstradimit të NCA-së, dy kontrabandistë të dyshuar të njerëzve janë gjurmuar dhe arrestuar. Bandat e kontrabandës rrezikojnë jetën e njerëzve që transportojnë thjesht për përfitime dhe lakmi, nuk kujdesen për rreziqet apo sigurinë e tyre.
Trajtimi i kontrabandës së njerëzve është një përparësi për NCA dhe ne do të vazhdojmë punën tonë të ngushtë me partnerët tanë në Francë dhe në të gjithë Evropën për të bërë gjithçka që mundemi për të prishur dhe çmontuar grupet përgjegjëse të këtyre kalimeve”.
