Franca dhe Britania, në koordinim me Shtetet e Bashkuara, po punojnë për të finalizuar një rezolutë të Këshillit të Sigurimit të OKB-së në ditët në vijim, e cila do të hidhte themelet për një forcë të ardhshme ndërkombëtare në Gaza.
Me një armëpushim të paqëndrueshëm të ndërmjetësuar nga SHBA-ja midis Izraelit dhe Hamasit, ka filluar planifikimi për një forcë ndërkombëtare për të stabilizuar sigurinë në enklavën palestineze, thanë të mërkurën dy këshilltarë të lartë amerikanë, shkruajnë mediat e huaja.
Duke folur me gazetarët në Paris, zëdhënësi i Ministrisë së Jashtme franceze, Pascal Confavreux, theksoi se një forcë e tillë kishte nevojë për një mandat të OKB-së për të siguruar një themel të fortë në të drejtën ndërkombëtare dhe për të lehtësuar procesin e marrjes së kontributeve të mundshme nga vendet.
“Franca po punon ngushtë me partnerët e saj për krijimin e një misioni të tillë ndërkombëtar, i cili duhet të formalizohet përmes miratimit të një rezolute të Këshillit të Sigurimit të OKB-së”, ka thënë ai.
Rezoluta e OKB-së po diskutohet me amerikanët
“Diskutimet, veçanërisht me amerikanët dhe britanikët, janë duke vazhduar për të propozuar këtë rezolutë në ditët në vijim”.
Parisi priti disa takime me fuqi të tjera evropiane dhe arabe më 10 tetor për të hartuar ide për tranzicionin pas luftës në Gaza, duke përfshirë edhe mënyrën se si mund të formohet një forcë ndërkombëtare.
Diplomatët thanë se forca stabilizuese nuk do të ishte një forcë formale paqeruajtëse e Kombeve të Bashkuara e paguar nga organi botëror.
Në vend të kësaj, një rezolutë e Këshillit të Sigurimit mund të pasqyronte veprimet e ndërmarra nga organi 15-anëtarësh për të mbështetur vendosjen e një force ndërkombëtare për të luftuar bandat e armatosura në Haiti.
Kjo rezolutë përcakton dhe autorizon misionin dhe shtetet që kontribuojnë në forcë që të “marrin të gjitha masat e nevojshme” – kodi për përdorimin e forcës – për të zbatuar mandatin.
“Forca stabilizuese do të merr pak kohë”, i tha kryeministri britanik Keir Starmer parlamentit të martën.
“Termat e referencës janë ende duke u hartuar. Ekziston një rezolutë e Këshillit të Sigurimit të Kombeve të Bashkuara për krijimin e forcës, ose shpresoj se do të ketë, por termat më të gjera të referencës nuk janë rënë dakord ende”.
Indonezia më parë ofroi 20,000 trupa
Ndër vendet me të cilat SHBA-të po flasin për të kontribuar në forcë janë Indonezia, Emiratet e Bashkuara Arabe, Egjipti, Katari dhe Azerbajxhani, thanë këshilltarët në kushte anonimiteti.
Gjithashtu, aktualisht ka deri në dy duzina trupa amerikane në rajon për të ndihmuar në ngritjen e operacionit, duke shërbyer në një rol “koordinimi, mbikëqyrjeje”, thanë ata.
Italia ka thënë publikisht se ishte e gatshme të merrte pjesë.
Presidenti indonezian Prabowo Subianto i tha Asamblesë së Përgjithshme të Kombeve të Bashkuara më 23 shtator se nëse do të kishte një rezolutë të OKB-së, Indonezia ishte e përgatitur të vendoste 20,000 ose më shumë trupa në Gaza për të ndihmuar në sigurimin e paqes.
Asambleja e Përgjithshme e OKB-së me 193 anëtarë muajin e kaluar votoi me shumicë dërrmuese për të miratuar një deklaratë që synonte të çonte përpara një zgjidhje me dy shtete midis Izraelit dhe palestinezëve, e cila mbështet vendosjen e një misioni të përkohshëm ndërkombëtar stabilizimi të mandatuar nga Këshilli i Sigurimit të OKB-së.
