Klubet kineze të futbollit dhe përfaqësueset duhet t’i nënshtrohen “stërvitjeve pranverore ushtarake” për të mposhtur koronavirusin.

E me këto stërvitje shpresohet edhe të realizohet ëndrra e presidentit të Kinës, Xi Jinping që të bëjë vendin forcë në futboll, kanë thënë zyrtarët kinezë, shkruan agjencia AFP të martën, transmeton Koha.net.

Ndeshjet e futbollit në Kinë janë pezulluar në afat të pacaktuar për të parandaluar përhapjen e koronavirusit, por Federata e Futbollit të Kinës ka lëshuar disa urdhra të detajuar, duke i treguar klubeve se sa gjatë lojtarët duhet të stërviten çdo javë, çfarë ushtrime të bëjnë dhe sa kilogramë duhet të kenë.

Instruksionet e ashpëra, që janë të fundit nga një numër i madh që janë dhënë nga Federata e Futbollit të Kinës gjatë viteve, do të priten me befasi nga trajnerët si Rafael Benitez e Fabio Cannavaro që kanë përvojë në futbollin evropian.

Por, Cannavaro, që drejton klubin kampion të Superligës së Kinës, Guangzhou Evergrande dhe Benitez që drejton klubin Dalian Pro, janë në mesin e trajnerëve që do të merren përgjegjës direkt për inkorporim të regjimit stërvitor në programet e tyre para-sezonale.

Urdhëri është marrë të premten dhe klubet kanë afat deri sot për të njoftuar Federatën e Futbollit të Kinës se si do të aplikojnë këtë plan stërvitor. Po ashtu do të ketë kontrolle të rastësishme për të siguruar se klubet po aplikojnë urdhrat.

Federata ka thënë se stërvitja është bërë gati për të ndihmuar realizimin e planit madhor të presidentit Xi, për të bërë Kinën vend të madh të futbollit.

Në të njëjtën kohë, lojtarët duhet po ashtu të bëjnë pjesën e tyre për të luftuar koronavirusin vrasës, që është shfaqur në qendër të Kinës në dhjetor dhe është përhapur nëpër botë.

“Duhet arritur parandalimi i epidemisë dhe kontrolli në njërën dorë dhe përqendrimi në stërvitje dhe përgatitjet për beteja në dorën tjetër. Të dy duart duhen të jenë të forta dhe dyja betejat duhet fituar. Përfaqësueset e meshkujve dhe femrave dhe klubet profesioniste të futbollit duhet të ndjekin në mënyrë rigoroze njoftimet”, është thënë nga federata.

Rezultatet e kontrolleve të befasishme do të bëhen publike dhe klubet do të renditen sipas tyre, në mënyrë që të turpërohen ato që nuk kanë ndjekur urdhrat.

“Kryetrajneri i secilit klub është përgjegjës”, është thënë nga federata.

Është kërkuar që skuadrat të stërviten së paku 16 orë në javë dhe të arrijnë shënjestrat të caktuara, ku përfshihen numër i caktuar i pompave e kërcimeve vertikale.

Gjithë lojtarët duhen të kenë yndyrë trupore më pak se 11 për qind.

Stinori në Superligën e Kinës ishte paraparë të fillonte në fund të shkurtit, por u shty në afat të pacaktuar për shkak të koronavirusit. Shumica e skuadrave janë duke stërvitur jashtë vendit.

Rregullat e reja do të aplikohen edhe për përfaqësueset e meshkujve dhe femrave. Përfaqësuesja e meshkujve zë pozitën e 76-të në renditje të FIFA-s dhe ishte kualifikuar vetëm një herë në Kampionat Botëror, në vitin 2002.

Është vetëm urdhri i radhës i stilit ushtarak që ka dhënë Federata e Futbollit të Kinës për të ngritur cilësinë e përfaqësueses.

Përfaqësueset e Kinës dhe klubet elitare më herët kishin dërguar futbollistët e rinj në kampe ushtarake për stërvitje intensive.