Prokuroria e Tiranës ka përfunduar hetimet dhe ka dërguar për gjykim pesë shtetas të Kosovës, të akuzuar për veprën penale “Kontrabandë me mallra të licencuara”, kryer në bashkëpunim, në bazë të nenit 173/2 të Kodit Penal.
Sipas dosjes hetimore, ngjarja ka ndodhur në dhjetor të vitit 2024, kur Altin Maqastena, Bekim Zenuni, Andi Grabanica, Ardian Ismajli dhe Ferat Zenuni mbërritën nga Stambolli në Aeroportin e Rinasit, duke pasur me vete një shumë të padeklaruar prej 300.000 eurosh në para cash, si dhe 14 valixhe të mbushura me medikamente.
Pas një kontrolli të imtësishëm nga autoritetet doganore dhe strukturat e Antikontrabandës dhe Antitrafikut, u konstatua se valixhet përmbanin mbi 1 milion tableta medikamentesh me markën “Unified”, me një peshë totale prej 417.1 kilogramësh.
Të gjitha barnat dhe shuma monetare u sekuestruan nga autoritetet shqiptare asokohe.
Nga hetimet e kryera rezultoi se medikamentet ishin futur në mënyrë të paligjshme në territorin e Shqipërisë, pa asnjë autorizim tregtimi apo përdorimi, dhe pa pullën e kontrollit të lëshuar nga Autoriteti Kombëtar i Barnave dhe Pajisjeve Mjekësore (AKBPM), siç kërkohet nga Ligji nr. 105/2014 “Për barnat dhe shërbimin farmaceutik”, i ndryshuar.
Prokuroria konstaton se pesë të pandehurit kanë vepruar në bashkëpunim për të realizuar kontrabandën dhe ka vendosur t’i çojë ata për gjykim, duke ngritur ndaj tyre akuzën për “Kontrabandë me mallra të licencuara”.
