Ushtria izraelite ka bërë të ditur se po vijojnë përpjekjet në disa fronte për lirimin e pengjeve.
Sipas ushtrisë izraelite Hamasi po mban peng 155 persona.
“Ne po bëjmë çmos, natyrisht, për të identifikuar fatin e tyre të saktë përmes burimeve të ndryshme, dhe ne kërkojmë nga komuniteti ndërkombëtar dënim të qartë dhe kërkesë për lirimin e pengjeve”, tha presidenti i Izraelit, Isak Herzog në një intervistë me Ëolf Blitzer të CNN.
Herzog tha se është një “situatë e ndërlikuar” sepse Hamasi nuk “i bindet asnjë rregulli të ligjit ndërkombëtar humanitar në asnjë mënyrë apo format. Për vite të tëra, ata kanë mbajtur ushtarë izraelitë, trupa, qytetarë nga raundet e mëparshme, madje nuk kanë thënë asnjë informacion për fatin e tyre, vendndodhjen dhe se si ndihen.”
Ai tha se ka “një përpjekje të madhe ndërkombëtare” për të rikthyer pengjet dhe falënderoi veçanërisht SHBA-në për mbështetjen e saj.
Presidenti izraelit tha se disa nga pengjet kanë nevojë për mjekime dhe trajtim të veçantë, duke e quajtur situatën në lidhje me shëndetin e tyre “jashtëzakonisht të brishtë”.
