Një tifoz i zjarrtë i Olympique Marseille është kthyer në simbol të humbjes në rrjetet sociale, pasi “misioni i tij i çmendur” për të ndalur PSG-në në Ligën e Kampionëve përfundoi në mënyrën më të turpshme të mundshme – i zhytur në një shatërvan, me fanellën e Interit veshur dhe me sytë plot lot.
Ky tifoz, emri i të cilit nuk është bërë publik, ka ndjekur thuajse çdo ndeshje të PSG-së këtë sezon, jo për t’i mbështetur, por për të përkrahur kundërshtarët e tyre. Ai është fotografuar dhe filmuar në stadiume të ndryshme, herë me fanellën e Aston Villa-s, Liverpool dhe së fundmi me fanellën e Interit, në finalen e madhe të Champions League.
Finalja e luajtur në Wembley përfundoi me një rezultat të thellë: PSG 5 – 0 Inter. Një triumf historik për klubin parizien, që ngre për herë të parë në histori trofeun më të lakmuar të futbollit Europian.
Pas kësaj disfate, tifozi i Marsejës u bë viral në rrjetet sociale, teksa u pa duke u hedhur me dëshpërim në një shatërvan publik, i veshur me fanellën e Interit. Në video, që është përhapur me shpejtësi, ai dëgjohet duke thënë: “Nuk ka më kuptim. E ndoqa çdo kundërshtar të PSG-së, e lashë zemrën time në çdo ndeshje… dhe ata sërish fituan!”
Rivaliteti mes Marseille dhe PSG është një ndër më të zjarrtët në Francë dhe tifozët e dy kampeve nuk lënë rast pa u përplasur. Por ky tifoz u bë shembulli më ekstrem i urrejtjes ndaj rivalëve, i kthyer më pas në simbol të humbjes së pashpresë.
Ndërkohë, tifozët e PSG-së nuk e lanë rastin të shkojë dëm – videoja e “humbësit më të madh në histori” po shpërndahet masivisht si një trofe tjetër i fitores së tyre legjendare.
